لەسەر راسپاردەی سەرۆكی حكوومەتی هەرێمی كوردستان، دیوانی ئەنجومەنی وەزیران پلانی ستراتیژیی بەرەنگاربوونەوەی گەندەڵیی تاوتوێ كرد.

ئه‌مڕۆ یه‌كشه‌ممه‌ 2/2/2020، لەسەر راسپاردەی مه‌سرور بارزانى، سەرۆكی حكوومەتی هەرێمی كوردستان، دیوانی ئەنجومەنی وەزیران بە سەرپەرشتیی ئومێد سەباح، سەرۆكی دیوان و ئامادەبوونی هەر یەك له سەرۆكی فەرمانگەی هەماهەنگی و بەدواداچوون، سەرۆكی دەستەی دەستپاكی، سەرۆكی داواكاری گشتی، سەرۆكی ئەنجومەنی شوورا و نوێنەری دیوانی چاودێری دارایی، پلانی ستراتیژیی بەرەنگاربوونەوەی گەندەڵیی تاوتوێ كرد.

لە كۆبوونەكەدا كه چەندین پسپۆر و مامۆستایانی زانكۆ ئامادە ببوون، هێڵە گشتییەكانی بەرنامەی كابینەی نۆیەم سەبارەت به پرۆسەی چاكسازی خرایە ڕوو، هه‌روه‌ها سەرنج و تێبینییەكان بە هەند وەرگیران.

لە كۆبوونەوەكەدا باس لە هەنگاوی كرداری کرا بۆ لابردنی بەربەستەكانی بەردەم پرۆسەی دادپەروەری، شەفافیەت و گەیشتن بە حوكمڕانییەكی باشتر بۆ خزمەتكردنی هاووڵاتیان.

لە كۆتاییشدا بڕیار درا لێژنەیەكی تایبەت بۆ دەوڵەمەندكردنی ستراتیژییەتی بەرەنگاربوونەوەی گەندەڵی پێك بهێنرێت و لە كۆتایی مانگی ئاداری ئەمساڵ ڕاسپاردەکانی تەواو بکات.












باسنيوز