ئەمڕۆ شەممە لە ڕێوڕەسمی شازدەیەمین ساڵیادی شەهیدانی یەکی شوبات لەسەر مۆنۆمێنتی شەهیدان لە پارکی سامی عەبدولڕەحمان کە بە ئامادەبوونی هەر سێ سەرۆکایەتییەکەی هەرێمی کوردستان بەڕێوە چوو، بریکاری وەزارەتی شەهیدان وتارێکی پێشکەش کرد و گوتی خوێنی شەهیدانی یەکی شوبات بووە هۆی یەکێتی و تەبایی گەلەکەمان.

لەمبارەوە بەرەڤان حەمدی، بریکاری وەزارەتی شەهیدان و ئەنفالکراوانی حکوومەتی هەرێمی کوردستان لە وتارێکدا بە بۆنەی شازدەیەمین ساڵیادی یەکی شوبات گوتی: "ئەمڕۆ لێرە کۆ بووینەتەوە هەتا ڕێز لە یاد و بیرەوەیی 103 شەهیدی کارەساتی یەکی شوبات بگرێن کە ١٦ ساڵ لەمەوبەر و لەناو دوو بارەگای لقی دووی پارتی و مەڵبەندی سێی یەکێتی لە هەولێر ڕوویان دا. بێگومان خوێنی قوربانیانی یەکی شوبات بووە هۆی یەکڕێزی و تەبایی گەلەکەمان".

بریکاری وەزارەتی شەهیدان گوتیشی: "بنیاتنانی ئەو ئارامی و ئاسایش و خوشگوزەرانییەی کەلە هەرێمی کوردستان هەیە، لە سایەی قوربانیدان شەهیدان و خۆڕاگریی خەڵکی کوردستان و پێشمەرگە قارەمانەکان بووە".

بەرەڤان حەمدی گوتیشی: "ڕێوڕەسمی ئەمڕۆمان تەنیا تایبەتە بە دانانی تاجەگوڵینە و بۆ ئەم مەبەستەش شەش تاجەگوڵینەمان ئامادە کردووە کە بە شێوەی پرۆتۆکۆلی سەرۆکی حکوومەتی هەرێمی کوردستان، سەرۆکایەتیی هەرێمی کوردستان، سەرۆکایەتیی پەرلەمانی کوردستان، حزب و لایەنە سیاسییەکان، کونسوول و نوێنەرایەییە بیانییەکان و کەسوکاری شەهیدان و قوربانییەکان و ڕێکخراو و دامەزراوەکان، تاجەگوڵینە لەسەر مۆنۆمێنتی شەهدانی یەکی شوبات دادەنێن".











باسنيوز