فەرماندەی هەسەدە: بەشی حکوومەتی سووریا لە نەوتی رۆژئاوای کوردستان دەدەین
مەزڵوم کۆبانی، فەرماندەی گشتیی هەسەدە لە چاوپێکەوتنێکی رۆژنامەی (شەرقولئەوسەت)، رایگەیاندووە، هێزە ئەمریکییەکان لە رۆژئاوای کوردستان بەردەوام جموجۆڵیان هەیە و ”بە گشتیی دەتوانم بڵێم ژمارەیان کەم نەبووەتەوە“.
مەزڵوم کۆبانی، کە مەزڵوم عەبدیش دەناسرێ، هەروەها رایگەیاندووە، هەسەدە و ئەمریکا لەسەر رووبەڕووبوونەوەی رێکخراوی تیرۆریستی داعش رێککەوتوون و ئێستاش ئەو رێککەوتنە کاری پێدەکرێت و خاڵێکی بۆ زیاد کراوە، کە پاراستنی کێڵگە نەوتییەکانە.
فەرماندەی گشتیی هەسەدە ئاماژەی بە بوونی رێککەوتنێک لەگەڵ رژێمی سووریا کردووە و رایگەیاندووە، ”ئێستا لێکتێگەیشتنێک لە نێوان ئێمە و هێزەکانی حکوومەتی سووریا بە چاودێریی رووسیا، هەیە“.
دوای هێرشی سوپای تورکیا و کشانەوەی هەسەدە لە هەندێک ناوچەی رۆژئاوای کوردستان، سوپای ئەمریکاش تەنیا لە دەوروبەری کێڵگە نەوتییەکان ماوەتەوە و بە گوتەی مەزڵوم کۆبانیش، ئەمریکا بەڵێنی داوە ئەگەر ئەمجارە هێرش بکرێتە سەر هەسەدە، ئەوا بەرگریی لێ بکات.
کۆبانی لەبارەی دانوستاندنی نێوان هەسەدە و تورکیا، رایگەیاندووە، ”دانوستاندنی ناڕاستەوخۆ لەنێوان ئێمە و تورکیا لەڕێی ئەمریکییەکانەوە، هەیە“.
فەرماندەی گشتیی هەسەدە پێی وایە تورکیا هەوڵی لەناوبردنی کورد دەدات و ئێستاش دەستی بە گۆڕینی دیمۆگرافیای ئەو ناوچانە کردووە، کە دەستی بەسەردا گرتوون.
هێزەکانی سوپای رژێمی سووریا بە رێککەوتن لەگەڵ هەسەدە لە ناوچە سنوورییەکانی نێوان رۆژئاوا و باکووری کوردستان (سووریا و تورکیا) جێگیر کراون، هەروەک مەزڵوم کۆبانی رایگەیاندووە، ”ئێستا لە هیچ شوێنێک ئێمە و تورکیا بەرامبەر یەک نین“، سوپای سووریا لەنێوانیانە.
فەرماندەی گشتیی هەسەدە جەختی لەوە کردووەتەوە، کە هەسەدە هێزێکی نیشتمانیی سووریە، دوای کشانەوەی هێزەکانی رژێمی سووریا بۆ پاراستنی رۆژئاوای کوردستان دروست بووە و بەشێکە لە سیستەمی بەرگریی سووریا و بە پێویستیشی دەزانێ ئەو بابەتە لە دەستووری سووریا جێگەی بکرێتەوە.
مەزڵوم کۆبانی رەتی دەکاتەوە هەوڵی جیابوونەوە لە سووریا یان راگەیاندنی هەرێمێک بدەن و رایگەیاندووە، ”چەندین جار رامانگەیاندووە، کە پرۆژەی ئێمە جوداخواز نییە“.
کۆبانی لەبارەی نەوتی رۆژئاوای کوردستان، رایگەیاندووە، نەوت موڵکی گەلی سووریایە و داهاتەکەی بەسەر هەموو پارێزگاکان دابەش دەکرێت و هەموو لایەنەکان بە حکوومەتی رژێمی سووریاوەش بە ناڕاستەوخۆ، بەشی خۆیان لە نەوتی رۆژئاوا پێ دەدرێت.
باسنيوز
