ئەمڕۆ یەكشەممە، سەرۆكایەتیی شارەوانی سلێمانی بۆ یەكەمجار بە ئامێرێكی دەگمەن لقە براوەكانی درەختەكانی پاركی ئازادیی هاڕێوە و بەرپرسی ڕاگەیاندنی سەرۆكایەتیی شارەوانیی سلێمانیش ڕای دەگەیەنێت هاڕاوەی درەختەكان دەكرێنەوە بە پەیین و دەكرێنەوە بنی درەختەكان.

لەمبارەوە زەردەشت ڕەفیق، بەرپرسی ڕاگەیاندنی سەرۆكایەتیی شارەوانیی سلێمانی، ڕايگەیاند: "ئەمڕۆ یەك شەممە 15/12/2019 سەرۆكایەتیی شارەوانیی سلێمانی بەمەبەستی سوودوەرگرتن لە لق و پۆپی بڕاوی درەختەكانی پاركی ئازادی، بۆ یەكەمجار ئامێری هاڕینی لقە بڕاوەكانی خستە كار".

گوتیشی: "گرنگیی ئامێرەكە لەوە دایە بەهۆیەوە دەتواندرێت سوود لە هاڕاوەی لقی درەختەكان وەربگیرێت وەك (پتمۆس) پەیین و بەكاری بهێنێتەوە بۆ درەختەكان، ئەمە جیالەوەی ئەركی فڕێدانی لق و بەشە زیادەكانی درەختەكانیش لا دەبات".

ئاماژەی بەوەش دا "ئامێرەكە لەلایەن كۆمپانیاكانی كۆكردنەوەی خۆڵ و خاشاكی شاری سلێمانییەوە دابین كراوە".













باسنيوز