ھەر یەک لە لیژنەکانی یاسایی، تەندروستی، کاروباری کۆمەڵایەتی و ناوخۆ لەسەر پرۆژە یاسای ماددە ھۆشبەرەکان و کارتێکەرە عەقڵییەکان گەیشتنە رێککەوتن و راپۆرتی ھاوبەشیان لەسەر پرۆژەکە ئامادە کردووە.

بەپێی زانیارییەکان دوای ناردنی پرۆژە یاسای ماددە ھۆشبەرەکان و کارتێکەرە عەقڵییەکان لەلایەن حکوومەتەوە بۆ پەرلەمانی کوردستان، لیژنەکان بە جیا راپۆرتیان لەسەر پرۆژەکە ئامادە کرد.

دواتر ھەر چوار لیژنەکە لە کۆبوونەوەیەکدا راپۆرتی ھاوبەشیان لەسەر پرۆژەکە ئامادە کرد و بڕیارە ڕۆژی دووشەممە١٧ی١٢ی٢٠١٩ خوێندنەوەی دووەمی بۆ بکرێت.

پرۆژە یاسای ماددە ھۆشبەرەکان یەکەمین پرۆژە یاسای کابینەی نۆیەمی حکوومەتی هەرێمی کوردستان کە بۆ پەرلەمانی نارد و تا ئێستا خۆیندنەوەی یەکەمی بۆ کراوە.

راپۆرتەکە لە٥١ ماددە پێک ھاتووە و پرۆژەکە سزا و چاکسازی لە نێوان بەکارھێنەران و بازرگانان بە مادە هۆشبەرەکانی دیاری کردوە.

بە پەسەندکردنی ئەم پرۆژەیە ھەرێمی کوردستان لەبارەی ماددە ھۆشبەرەکانەوە دەبێتە خاوەن یاسای تایبەت بە خۆی.













باسنيوز