دەنگۆی میدیای لاهوور جەنگی لەبارەی کەمکردنەوەی مووچەی فەرمانبەران بەدرۆ دەخرێتەوە
لە پێش نیوەڕۆی ئەمڕۆ چوارشەممە ١١ی ١٢ی ٢٠١٩ەوە کۆبوونەوەی ئەنجوومەنی وەزیران دەستی پێکردووە و هەروەک ڤالا فەرید، وەزیری هەرێم بۆ کاروباری پەرلەمان ڕایگەیاندبوو، لە کۆبوونەوەکەدا پڕۆژەیاسای چاکسازی پەسەند دەکرێت و ڕەوانەی پەرلەمان دەکرێت.
لەمبارەیەشەوە میدیای لاهوور جەنگی هەواڵێکیان لە زاری پەرلەمانتارێکی پێشووی یەکێتییەوە بڵاو کردووەتەوە و بانگەشەی ئەوەیان کردووە کە حکوومەتی هەرێمی کوردستان لە پڕۆژەیاساکەدا پێشنیازی کەمکردنەوەی دەرماڵە و مووچەی فەرمانبەرانی کردووە.
لە بەرامبەردا ڕێبوار بابکەیی، ئەندامی فراکسیۆنی پارتی لە پەرلەمانی کوردستان ڕایگەیاند، هێشتا ناوەڕۆکی پڕۆژەیاسای چاکسازی بە دەست هیچ کەس و پەرلەمانتارانیش نەگەیشتووە.
جەختیشی کردەوە کە پڕۆژەیاساکە بۆ ڕێکخستنی دەرماڵەی فەرمانبەران و مووچەخۆرانی هەرێمی کوردستانە و ”بەو مانایە نییە کە مووچەی فەرمانبەران کەم بکرێتەوە و بە هیچ شێوەیەک مووچەی فەرمانبەران دەستکاری ناکرێت“.
دووپاتیشی کردەوە، بەهۆی ئەوەی کەس ناوەڕۆکی پڕۆژەیاساکەی نەدیوە، ”ئەوانەی قسە لەسەر ئەم پڕۆژەیاسایە دەکەن“، قسەکانیان ڕاست نییە و دەیانەوێت ڕێگە لە تێپەڕاندنی بگرن.
لە ژمارەی دوێنێ سێشەممە ٤٥٧ی هەفتەنامەی (باس)دا ئەوە بڵاو کراوەتەوە، پرۆژەی (چاکسازی لە خانەنشینی و مووچە و دەرماڵە و بەخشین و ئیمتیازاتەکانی دیکە لە هەرێمی کوردستان- عێراق)، كە وەک باس دەکرێت لە پتر لە ٢٠ ماددە پێكهاتووە، بڕیار بوو ١٥ی ١١ی ٢٠١٩، دوا وادەی کاری ئەو لێژنەیە بێت کە ئیشی لەسەر ئەو پرۆژەیاسایە کردبوو و نوێنەری هەموو لایەنە بەشدارەکانی حکوومەتیشی تێدایە، بۆیە وا چاوەڕوان دەکرا هەفتەی رابردوو، هەر لەگەڵ تەواوبوونی، بۆ گفتوگۆی کۆتایی و پەسەندکردنی لە ئەنجوومەنی وەزیران لە کۆبوونەوەی هەفتانەیدا، بڕیاری یەکجاریی لێ بدرێت و رەوانەی پەرلەمانی کوردستان بکرێت، بەڵام بەهۆی ناڕازیبوونی لایەنێکەوە راگیرا. بۆیە ئەم هەفتەیە، یان سەرەتای هەفتەی داهاتوو، بە پێداگریی سەرۆکی حکوومەت، دوا وادەیە بۆ ئەوەی پڕۆژەکە چیتر رانەگیرێت و ببردرێتە ناو کۆبوونەوەی ئەنجوومەنی وەزیران و پەسند بکرێت تاکوو ڕەوانەی پەرلەمان بکرێت.
باسنیوز
