رێڤەبەرێ‌ خالا سنۆری یا سەرزێرێ ل قەزا ئامێدیێ ل‌ پارێزگەها دهۆكێ‌ دیاركركو دەست ب هەولێن رژد هاتیە كرن سالا بهێت كارێ‌ بازرگانی ژی ل دەرگەهێ‌ سەرزێرێ یێ‌ سنۆریدا دگەل توركیا بهێتە كرن.

عرفان سلێمان، رێڤەبەرێ‌ خالا سنۆری یا سەرزێرێ ل قەزا ئامێدیێ‌ پارێزگەها دهۆكێ‌ دیار كر كو: “نۆكە ئەم هەولددەن رێڤەبەریێن پەیوەندار وەكو چاڤدێریا ساخلەمیێ‌ و فیتەرنەریێ‌ و هەموو رێڤەبەریێن دی یێن پەیوەندار پشكێن خوە ل سەرزێرێ ڤەكەن چونكو دەمێ‌ بیتە بازرگانی پێدڤیە هەموو رێڤەبەریێن پەیوەندار دگەل مە دا بن پێخەمەت پێكڤە كاركرنێ‌ و باشتركرنا رەوشا بازرگانی ل دەڤەرێ‌ و كۆنترۆلكرنا هەموو جۆرێن وان كەرەستێن بازرگانی پێ‌ دهێتە كرن یێن خارنێ‌ و ڤەخارنێ‌ هەتا ژی یێن ناڤمالێ ژی بن. لایەنێ‌ توركیا دگەل مە كاردكەت بۆ هندێ سالا بهێت دەرگەهێ سەرزێرێ ببیتە بازرگانی. ئەم چاڤەرێنە هەموو كارێن پێدڤی بهێنە ئەنجامدان داكو ببیتە بازرگانی پتر خزمەتا خەلكێ‌ مە بهێتە كرن".

خویا ژی كر كو: "نۆكە دەرگەهێ‌ سەرزێرێ بۆ مەرەمێن هاتن وچوونێ‌ و گەشتیاری دهێتە بكارئینان و پلان ودیزاین باشتركرنا جادەیێن سەرزێرێ ژی هاتینە دانان بۆ وێ‌ چەندێ دەمێ‌ بیتە بازرگانی ئاسان‌ هاتن و چوون‌ بهێتە كرن".










باسنيوز