به‌ نیگه‌رانییه‌كى زۆره‌وه‌ له‌ به‌رده‌وامیى ڕووداو و توندوتیژییه‌كانى به‌غدا و پارێزگاكانى دیكه‌ى عێراق ده‌ڕوانین. ئه‌و كوشتاره‌ى به‌رامبه‌ر به‌ خۆپیشانده‌رانى سڤیل له‌ پردى سنه‌ك و گۆڕەپانى خللانى له‌ به‌غدا كرا، تاوانى بێ پاساون و تاوانكاران هه‌ر كێ و له‌ هه‌ر لایه‌نێكه‌وه‌ بن، داموده‌زگا و لایه‌نه‌ به‌رپرسه‌كانى عێراق ده‌بێ بیاندۆزنه‌وه‌ و به‌پێى یاسا مامه‌ڵه‌یان له‌گه‌ڵدا بكرێت.

له‌ كاتێكدا پرسه‌ و سه‌ره‌خۆشیى قووڵمان ئاراسته‌ى كه‌سوكارى قوربانییان ده‌كه‌ین و هاوخه‌میانین، هیواى زوو چاكبوونه‌وه‌ش‌ بۆ برینداران ده‌خوازین، دووپاتى ده‌كه‌ینه‌وه‌ كه‌ خۆپیشاندانى ئاشتیانه‌ و سڤیل، مافێكى ده‌ستووریى ڕه‌وا و پارێزراوه‌ و به‌ هیچ شێوه‌یه‌ك قبووڵكراو نییه‌ ئه‌و زێده‌ڕۆییه‌ له‌ توندوتیژى‌ به‌رانبه‌ر به‌ خۆپیشانده‌ر‌ان به‌كار بێت و بكرێنه‌ ئامانجى ده‌ستڕێژ و هێرشى له‌وجۆره‌.

ئه‌ركى هه‌موو لایه‌كه‌ به‌ گیانێكى نیشتمانیى به‌رپرسیارانه‌وه‌، مامه‌ڵه‌ له‌گه‌ڵ دۆخه‌كه‌دا بكه‌ن تاكو له‌ ده‌ست ده‌رنه‌چێت و پێشهاتى ترسناكتر ڕوونه‌ده‌ن، چیتریش خوێن نه‌ڕژێت و هه‌مووان له‌ چوارچێوه‌ى یاسادا بجووڵێنه‌وه‌.



سه‌رۆكایه‌تیى هه‌رێمى كوردستان

7/12/2019