داعش لە سنووری شارەدێی (کوڵەجۆ)ی سەر بە قەزای کەفی لە ماوەی کەمتر لە دوو ھەفتە دوو جار ھێرشی کردووەتە سەر پێشمەرگە و لیژنەی پێشمەرگەی پەرلەمانی کوردستان بۆ لێکۆڵینەوە دەچێتە کوڵەجۆ.

عوسمان سێدەری، جێگری سەرۆکی لیژنەی پێشمەرگە لە پەرلەمانی کوردستان راگەیاند: "ئەمڕۆ شەممە ٧ی١٢ی٢٠١٩ لیژنەکەمان سەردانی شارەدێی کوڵەجۆ دەکەین".

لەبارەی مەبەستی سەردانەکەیان، گوتیشی: "مەبەست لە سەردانەکە بەدواداچوون و لێکۆڵینەوەیە لە ھێرشەکانی داعش و دەمانەوێت بزانین ھۆکاری ئەو ھێرشانە و کەموکورتی و پێداوستییەکان چین".

جێگری سەرۆکی لیژنەی پێشمەرگە گوتیشی: "دواتر راپۆرتێک لەبارەی دەرەنجامەکان دودەینە دەستەی سەرۆکایەتیی پەرلەمانی کوردستان بۆ لێکۆڵینەوە لەسەر ھێرشەکانی داعش".

لە ماوەی دوو هەفتەی ڕابردوودا لە سنووری خانەقین و شارەدێی کوڵەجۆی سەر بە قەزای کفری داعش دوو جار هێرشی کردووەتە سەر پێشمەرگە و ئاسایش و چەند شەهید و بریندارێک هەیە و وەزارەتی پێشمەرگەی حکوومەتی هەرێمی کوردستانیش بۆ پەتوترکردنی سەنگەرەکان هێزێکی لە لیوای 16 ڕەوانەی سنوورەکە کردووە.