فەرهەنگ غەفوور، بەڕێوەبەری گشتیی رۆشنبیری و هونەری هەولێر، لەمبارەیەوە رايگەیاند: "بەپێی فەرمانی وەزاریی لە ٥-١١-٢٠١٩ ئەنجوومەنی وەزارەتی رۆشنبیری لە كۆبوونەوەی خۆیدا ئەنجامی داوە، سەبارەت بە رێكخستنەوەی فێستیڤاڵەكان، بڕیار وایە یەكێك لەو فێستیڤاڵە نێودەوڵەتیانە لە دەڤەری سۆران بەڕێوە بچێت، ئامادەكارییەكانیش لەلایەن هەردوو بەڕێوەبەرایەتیی رۆشنبیریی ڕەواندز و سۆران و بە هەماهەنگی لەگەڵ سەنتەرە رۆشنبیرییەكان و رێكخراوەكانی چالاكیی مەدەنی و بە هەماهەنگی بەڕێوەبەرایەتی رۆشنبیری و هونەری هەولێر یەكەمین فیستیڤاڵی پێكەوەژیان، لەژێر ناونیشانی فێستیڤاڵی (پێكەوەژیان و ئاشتەوایی كۆمەڵایەتی) لە مانگی ئایار ٥-٢٠٢٠ ساز دەكرێت".

لە فێستیڤاڵەكەشدا كۆمەڵێك چالاكیی جۆراوجۆر و هونەری و كولتووریی گەلان، بەتایبەت كولتووری ئایینی و بەڕێوەچوونی چەند دیدار و پانێڵێك لەگەڵ كەسایەتییە رۆشنبیری و هونەرییەکان و بەتایبەت ئەو كەسایەتییانەی كە ڕۆڵیان هەبووە لە بواری رۆشنبیری و پێكەوەژیان و ئاشتەوایی كۆمەڵایەتی، ساز دەکرێت.

لەبارەی هەڵبژاردنی ناوچەكە بۆ ئەنجامدانی فیستیڤاڵی پێكەوەژیان، فەرهەنگ غەفور وتیشی: "ئەو دەڤەرە یەكێك بووە لە دیوی پێكەوەژیان رەنگدانەوەیەكی جوانی هەبووە لە هێڵە گشتییەكانی حكوومەتی هەرێمدا و ئاماژە بۆ ئەوە كراوە كە پێویستە پتەوكردنی ئاشتەوایی و كۆمەڵایەتی و پتەوكردنی فرە ئایینی و پێكەوەژیان لە هەموو دەڤەرەكانی كوردستان رەنگدانەوەی خۆی هەبێت. بۆیە یەكێك لە ئامانجەكانمان بۆ ئەنجامدانی ئەو فێستیڤاڵە، پیتەوكردنی رۆشنبیری و پەروەردەیی پێكەوەیی و فرە ئایینی و فرە نەتەوەییە بەگشتی".

ئاماژەشی بۆ ئەوەش كرد: "كە یەكێكی‌تر لە ئامانجەكانمان ئەوەیە، كە دەمانەوێت لەڕێگەی ئەو و چالاكییە هونەرییانەوە هەوڵ بدەین گەشتیاری زیاتر بێنە ناو ئەو ناوچە جوان و دڵڕفێنانەی هەرێمی كوردستان هەوڵی ئەوی بدەین بازاڕی ئەو ناوچانە لەڕێگەی ئەو فیستیڤاڵانەوە بووژانەوەی زیاتر بەخۆیەوە ببینێت".













باسنيوز