ل زوممار هژمارەكا عەرەبان ل سەر گۆندەكێ كوردان هاتینە ئاكنجیكرن
حەسەن خەلۆ، بەرپرسێ لیژنا پارتی ل ناحیا زوممار دیار كر كو: "پشتی دەستهەلاتا مە ل زوممار نەمایێ عەرەب یێن زڤرینە سەر گۆندێن كوردان ل دەڤەرا زوممار ب تایبەتی ژی گوندێ بەردیە ئەڤ گۆند یێ كوردانە نها هژمارەكا عەرەبان هاتینە ناڤ گۆندێ دا وناڤی گۆندێ ژی گوهارتینە وناڤەكێ عەرەبی داناینە سەر گۆندێ كوردان هەروەسا دوو گۆندێن دی ژی یێن كوردان هەبوون عەرەبان هەولدان كرن بهێنە ناڤدا وئەردی وان بچینن لێ پشتی خەلكێ ڤان هەردوو گۆندێن كوردان سكالا تۆماركرین ب ریێا دادگەهی مە شیا نەهێلن عەرەب دوو گۆندان داگیر بكەن".
خۆیا ژی كر كو: "نها خەلكێ مە یێ كورد دچن ئەردی خوە دچینن وجارەكا دی زڤرنە دهۆكێ و زاخۆ ئاكنجیی بن چونكو هیشتا نەشیاینە خێزانیێن خوە ببەنە وان گۆند و دەڤەران خەلكێ زوممار چاڤەرینە پێشمەرگەه زڤرتە دەڤەری بۆ دابینكرنا سەقامگیری هەر دەمێ پێشمەرگەهێ كوردستانێ هاتە زوممار دێ هەموو خەلكێ ڤەگەرن دێ 100% تەناهیی ل دەڤەری دروست بیت".
باسنيوز
