ئەمشەو یەکشەممە، بەهۆی پێکدادانی دوو ئۆتۆمبێل لەسەر رێگەی مەرزی نێودەوڵەتی پەروێزخان نۆ کەس برینداربوون و بۆ چارەسەرکردن بۆ نەخۆشخانە گوێزراونەتەوە.

رائید كارزان مەجید، گوتەبێژی بەڕێوەبەرایەتیی گشتیی پۆلیسی هاتووچۆی گەرمیان راگەیاند: رووداوەکە لەنێوان ئۆتۆمبێلێکی بارهەڵگر و مینی پاسێکدا بووە. نۆ کەس برینداربوونە و بۆ چارەسەرکردنیان رەوانەی نەخۆشخانەی شەهید هەژار لە کەلار کراون.

بەپێی زانیارییەکان ، ئۆتۆمبێلە بارهەڵگرەکە بەرەو مەرزی نێودەوڵەتی پەروێزخان رۆیشتووە و مینی پاسەکەش بە ئاراستەی کەلار هاتووە، لەنزیک کامپی ئاوارەکانی قۆرەتوو پێکیانداداوە.

پۆلیس دەڵێت، لێکۆڵینەوە لەلایەن تیمی هاتوچۆوە بەمەبەستی زانینی هۆکاری روداوەکە دەستیپێکردووه.