سەرۆکی حکوومەتی هەرێمی کوردستان پەیامێکی لەبارەی هێرشەکەی شەوی ڕابردووی چەکدارانی ڕێکخراوی تیرۆریستیی داعش بۆ سەر شارۆچکەی کوڵەجۆ بڵاو کردەوە.

لە پەیامەکەیدا، مەسرور بارزانی، سەرۆکی حکوومەتی هەرێمی کوردستان بەداخەوە باسی لە شەهیدبوونی بەڕێوەبەر و دوو کارمەندی ئاسایشی شارۆچکەی کوڵەجۆ و برینداربوونی چەند کارمەندێک لە ئەنجامی هێرشێکی تیرۆریستانی داعش کردووە.

هاوکات وێڕای سەرەخۆشیکردن لە کەسوکاری شەهیدان و هیوای چاکبوونەوە بۆ بریندارەکان، ئاشکرای کردووە: ”ئەم هێرشەی تیرۆریستانی داعش، نیشانی دەدات کە ئەم رێکخراوە تیرۆریستییە هێشتا بە تەواوی تێکنەشکێنراوە و ئێمەش لەمبارەوە چەندین جار هۆشیاریمان داوە“.

مەسرور بارزانی بە پێویستی دەزانێت، کۆمەڵگەی نێودەوڵەتی لە هاوکاریکردنی هەرێمی کوردستان و عێراق بەردەوام بێت بۆ رووبەڕووبوونەوەی داعش و کارکردن لە پێناو نەهێشتنی ئەو هۆکارانەی دەبنە هۆی سەرهەڵدان و چالاکبوونەوەی رێکخراوە تیرۆریستییەکان .



ئەمەش دەقی پەیامەکەیە:



پەیامێک لە سەرۆکی حکوومەتی هەرێمی کوردستانەوە


بەداخەوە دوێنی شەو لە ئەنجامی هێرشی تیرۆریستانی داعش بۆ سەر شارۆچکەی کوڵەجۆی سەر بە کفری ، بەڕێوەبەر و دوو کارمەندی ئاسایش شەهیدبوون و چەند کارمەندێکیش بریندار بوون.

پرسە و سەرەخۆشی لە کەسوکاری شەهیدەکان دەکەم و هیوادارم خوای مەزن بە بەهەشتیان شاد بکات و هیوای چاکبوونەوەش بۆ بریندارەکان دەخوازم .

ئەم هێرشەی تیرۆریستانی داعش، نیشانی دەدات کە ئەم رێکخراوە تیرۆریستییە هێشتا بە تەواوی تێکنەشکێنراوە و، ئێمەش لەمبارەوە چەندین جار هوشداریمان داوە . بۆیە پێویستە کۆمەڵگەی نێودەوڵەتی لە هاوکاریکردنی هەرێمی کوردستان و عێراق بەردەوام بێت بۆ رووبەڕووبوونەوەی داعش و ، کارکردن لە پێناو نەهێشتنی ئەو هۆکارانەی دەبنە هۆی سەرهەڵدان و چالاکبوونەوەی رێکخراوە تیرۆریستییەکان .


مەسرور بارزانی

سەرۆکی حکومەتی هەرێمی کوردستان

2019/11/30











باسنيوز