بڕیارە سبەینێ پێنجشەممە لە شاخی باڵامبۆی پارێزگای هەڵەبجە، پاڵەوانێتیی سێیەمی كۆماری بۆ فڕۆكەوانی و هەوایی پەڕەگلایدەر بەڕێوە بچێت و سەرۆكی یانەی ئاسمانیی هەڵەبجەش ڕای دەگەیەنێت لە پاڵەوانێتییەكەدا یاریزانانی هەڵبژاردەی عێراق بۆ پاڵەوانێتی وڵاتانی عەرەبی دیاری دەكرێن.

كامەران ئەحمەد، سەرۆكی یانەی ئاسمانیی هەڵەبجە، بە (باسنیوز)ی ڕاگەیاند: "سبەینێ 21/11/2019 لەسەر شاخی باڵامبۆ لە پارێزگای هەڵەبجە، یەكێتیی ئاسمانیی عێراق، پاڵەوانێتیی سێیەمی كۆماری بۆ فڕۆكەوانی و هەوایی پەڕەگلایدەر بەڕێوە دەبات و ماوەی 2 ڕۆژ دەخایەنێت".

گوتیشی: "لە پاڵەوانێتییەكەدا یانەی ئاسمانیی هەولێر و سلێمانی و دهۆك و هەڵەبجە لەسەر ئاستی هەرێمی كوردستان و لەسەر ئاستی عێراقیش 2 ـ 3 یانەی ئاسمانی بەشدار دەبن".

ئاماژەی بەوەش دا: "پاڵەوانێتییەكە بۆ مەبەستی دیاریكردنی یاریزانانی هەڵبژاردەی ئاسمانیی عێراقە بۆ بەشداریكردن لە پاڵەوانێتی وڵاتانی عەرەبی كە بڕیارە لە هەرێمی كوردستان ئەنجام بدرێت".

ڕوونیشی كردەوە: "هەر یانەیەك بە 3 یاریزان بەشداری لە پاڵەوانێتییەكەدا دەكەن و یاریزانانی دیكەی یانەكانیش دەتوانن بە تاك بەشداری لە پاڵەوانێتییەكەدا بكەن".










باسنيوز