هێزەکانی سووریای دیموکرات (ھەسەدە) شارۆچکەی تل تەمر رادەستی هێزەکانی رووسیا دەکەن.

روانگەی سووری بۆ مافەکانی مرۆڤ بڵاویکردەوە، کە هێزەکانی سووریای دیموکرات بە گوێرەی رێککەوتن لەگەڵ رووسیا و حکوومەتی سووریا، شارۆچکەی تل تەمر رادەستی هێزەکانی رووسیا دەکات.

بەگوێرەی رێککەوتنەکەش هێزەکانی رووسیا و حکوومەتی سووریا لە شارۆچکەی تل تەمر بڵاودەکرێنەوە و هێزەکانی تورکیا و چەکدارانی ئۆپۆزسیۆنیش لە دەوروبەری تل تەمرەوە تاوەکو سنووری سەرێکانی دەکشێنەوە.

روانگەی سووری بۆ مافەکانی مرۆڤ ئاماژەی بەوەشكردووە، نزیکەی 15 ئۆتۆمبێلی سەربازی رووسیا لە حەلەبەوە چوونەتە شاری قامشلۆ و لە فڕۆکەخانەی نێودەوڵەتی قامشلۆ جێگیر کراون، کە ژمارەیەک سەربازیش لەخۆ دەگرێت.

رەوانەکردنی هێزی زیاتر لەلایەن رووسیاوە، لە کاتێکدایە مۆسکۆ بەنیازە بنکەیەکی سەربازی لە فڕۆکەخانەی قامشلۆ دروست بکات و رۆژی پێنجشەممەی رابردوو ژمارەیەک هێلیکۆپتەری رەوانەی قامشلۆ کردبوو.



K24