دوای سێ ساڵ لە وەستانی كارەکانی پرۆژەی تونێلی (بەنی هەریر) لە سنووری ناحیەی مێرگەسۆر، ماوەی چەند ڕۆژێكە كاركردن لە تونێلەكە دەستی پێكردووەتەوە

كاروان كەریم خان، بەرێوەبەری ناحیەی خەلیفان، لەو بارەیەوە ڕايگەیاند: "لەلایەن كۆمپانیای یەرتاشی توركی كە سەرەتا كاریان لە پڕۆژەكە دەكرد، بەڵام بۆ ماوەی چەند ساڵێكە بەهۆی قەیرانی دارایی كاركردنیان لە تونێلەكە وەستابوو، نزیكەی مانگێكە لە رێكەوتی ٢٠-١٠-٢٠١٩ەوە هاتووتەنەوە سەر كارەكەیان و ئێستا كاركردن لە پڕۆژەكە بەردەوامە.

گوتیشی: "كۆمپانیای ناوبراو ئیرادەیەكیان هەیە بۆ ئەوەی پڕۆژە تەواو بكەن، بۆیە ئەگەر بێت و بارە داراییەكەیان بۆ فەراهەم بكرێت، ئەو بەشەی كە نزیكەی 51٪ی كارەكانی ماوە، لە ماوەی دیاریكراودا كە ١٨ مانگە كۆتایی بە كارەكانیان دێنن و پڕۆژە تەواو دەبێت".

بەڕێوەبەر ناحیەی خەلیفان ئاماژەشی بۆ ئەوەش كرد: "بەپێی ئەو گوژمەیەی بۆ تەواوكردنی پڕۆژەكان دابین كراوە، بۆ ناحیەی خەلیفان بڕی (ملیارێك و هەشت سەد ملیۆن) دینار تەرخان كراوە تایبەت بۆ چاکكردنی ڕێگا دەرەكییەكانی سنووری ناحیەكەمان، بەمەش ئێستا كاركردن لە پڕۆژەكان بەردەوامە. جیا لەوەش بڕی (هەشت سەد ملیۆن) دینار بۆ دروستكردنی بنكەی وەرزش و لاوان بودجە تەرخان كراوەو ئێستا كاركردن لەو پڕۆژەیەش بەردەوامە".

تونێلی بەنی هەریر بە درێژایی نزیكەی ٤ كیلۆمەتر كەوتووەتە نێوان ناحیەی هەریر و ناحیەی خەلیفان لە سنووری نێوان هەردوو قەزای شەقڵاوە و سۆران، ڕێگای هەولێر بە دەروازەی نێودەوڵەتیی حاجی ئۆمەران دەبەستێتەوە.

بەتەواوبوونی پڕۆژەكە مەودای نێوان هەولێر و قەزاكانی سۆران - چۆمان - ڕواندز - مێرگەسۆر بە ڕێژەیەكی بەرچاو كەم دەبێتەوە.















باسنيوز