عەرەبە بەدووەکان کە هاوردەی سەردەمی سەدام حوسێنن لەسنووری داقووقی پارێزگای کەرکووک چونەتە لای هێزەکانی سوپا تاوەکو رێگری لەچاندنی دانەوێڵەی جووتیارانی کورد بکەن.

زیاتر لە 10 گوندی ناوچەکانی تاڵەبانی، داودە و کاکەیی لەلایەن سوپای عێراقەوە رێگریان لێکراوە تاوەکو زەوییەکانیان بکێڵن و دەست بەچاندنی گەنم و جۆی ئەم وەرزە بکەن.

زاهیر رەشید کەریم، جووتیارە گوتی "جارجار سوپا دێنن و ناهێڵن بیکێڵین، دەڵێن ئەمە زەوی عەرەبەکانە و گرێبەستیان هەیە، ئەوان عەرەبی بەدوون و کاتی خۆی سەدام حوسێن هێناونی بۆ ئێرە".

ژمارەیەک جووتیاری گوندی یەنگیجەش سەردانی فەرماندەکانی سوپایان کرد و بەڵگەی خاوەندارێتی زەوییەکانیان بۆخستوونەتەڕوو، پێیان گوتبوون ئەو زەوییانە موڵکی باپیرانیانە و پەیوەندییان بەعەرەبی هاوردەوە نییە.

لەبارەی دەستوەردانەکانی سوپا لەکێشەی زەویوزار، نوێنەرانی کەرکووک لە پەرلەمانی عێراق لەڕێگەی سەرۆکایەتی کۆمارەوە پەیوەندییان بەفەرماندەیی گشتی هێزەکانی عێراقەوە کرد و سکاڵایان لە هێزەکان کردووە.

هەوڵێکی دیکەی عەرەبە هاوردەکان لەڕێگەی دادگاوەیە، دوای ئەوەی دادگای داقووق پشتئەستوور بەبەڵگەنامە فەرمییەکان زەوییەکانی لەبەرژەوەندی جووتیارێکی کورد یەکلاکردەوە.

زیاتر ملیۆنێک و دووسەد هەزار دۆنم زەوی کورد لەپارێزگای کەرکووک کێشەی موڵکدارییان هەیە 300 هەزار دۆنم لەساڵانی 1975 بۆ 1979 بەبڕیاری قیادەی سەورە لەکورد سەندراون و دراونەتە عەرەبی هاوردە. لە ساڵانی 1993 تاوەکو 2003، 800 هەزار دۆنم زەوی دیکە بەبڕیاری لیژنەی "شئون شیمال" لەکورد سەندراونەتەوە.

نزیکەی 90 هەزار دۆنم زەوییش بەبڕیاری جیاجیا لەکورد وەرگیراونەتەوە و بە گرێبەست دراون بە جووتیارانی عەرەب.