ئێوارەی ئەمڕۆ لە سنووری حاجی ئۆمەران سوپای پاسدارانی ئێران دەستڕێژی گولـلەیان لە ژمارەیەک کۆڵبەری کورد کرد و بەهۆیەوە دوو کۆڵبەر برینداربوون.

بریندارەکان ناویان سیروان ئەحمەد تەمەن 33 ساڵ و سلێمان هەمزە تەمەن 50 ساڵە کە بۆ چارەسەری پزیشک رەوانەی نەخۆشخانەی گشتیی چۆمان کراون.

لەبارەی رووداوەکە سیروان ئەحمەد: ئەوان 11 کۆڵبەر بوونە و ویستویانە لە کونەرێی گوندەژۆر کاڵا و کەلوپەل بگوازنەوە پیرانشاری رۆژھەڵاتی کوردستان، لە کانی ناوخۆش توشی کەمینی سوپای پاسدارانی ئێران بوونە و دراونەتە بەر گوللە، بەھۆیەوە ئەو و کاسبکارێکی دیکە برینداربوونە.

سیروان دەشڵێت، نۆ کەسەکەی دیکە گوللەیان بەرنەکەوتووە، بەڵام کۆڵەکانیان فڕێداوە و دەربازیان بووە.

ئەحمەد گەڵاڵی، بەڕێوەبەری تەندروستی چۆمان راگەیاند: بریندارەکان قاچ و دەستیان برینداربووە و ھەر یەکە و گوللەیەکیان بەرکەوتووە. ئێستاش چارەسەری پێویستیان بۆ کراوە.