ئێوارەی ئەمڕۆ یەکشەممە لەنێو لیوای 12ی پێشمەرگە لە بەردەڕەش، شەڕ لەنێوان چەند ئەفسەر و پێشمەرگە دروستبوو، بەهۆیەوە دوو کەس کوژران و یەکێکی دیکەش برینداربوو.

شەڕەکە لە بارەگای لیوای12ی پێشمەرگە، کە دەکەوێتە نێوان بەردەڕەش و مەندان لەنزیک چیای مەقلووب روویداوە و بەهۆیەوە رائیدێک و مولازمێک کوژراون.

سەرچاوەیەک لە ئاسایشی بەردەڕەش گوتی: بەڵێ شەڕ لەنێو لیوای 12ی پێشمەرگە روویداوە و بەهۆیەوە دوو کەس کوژراون و کەسێكی دیکەش برینداربووە.

بەگوتەی ئەو سەرچاوەیە ئەوانەی کوژراون و برینداربوون ئەمانەی خوارەوەن:

- رائید سەباح حەمەد شێخە (خەڵکی شارۆچکەی خەلیفان)ـە

- مولازمی یەک محەممەد شێخۆ عەلی (خەڵکی شارۆچکەی دینارتە).

- بریندارەکەش کوڕی رائید سەباحە و ناوی سەدادە

ئەو سەرچاوەیەی ئاسایش لەبارەی ئەوانەی کە تەقەکەیان ئاراستەی کوژراو و بریندارەکان کردووە و تۆمەتباری رووداوەکەن گوتی "ئەوانەی تەقەیان لەو سێ کەسە کردووە بران و هەڵاتوون، بەڵام تاوەکو ئێستا شوێنەکانیان دیارنییە".

وەک ئەو سەرچاوەیە ئاماژەی پێدەدات، بکوژەکان خەڵکی شارۆچکەی سەروچاوەی سەر بە قەزای رانیەن.

هێمن سلێمان، گوتەبێژى پۆلیسى دهۆک راگەیاند: رەوشەکە کۆنتڕۆڵکراوە و بریندارەکەش رەوانەی نەخۆشخانە کراوە.