دوێنێ دوای تەواوبوونی کۆبوونەوەکەی، پەرلەمانی عێراق بڕیاریدا لیژنەیەک بۆ هەموارکردنەوەی دەستوور پێکبهێنێت، ئەوەش نیگەرانی لێکەوتووەتەوە و یاسا ناسێک دەڵێت، پێویستە سەرۆککۆمار و پەرلەمانتارانی کورد بۆ خەڵکی روونبکەنەوە کێشەی خەڵکی عێراق گەندەڵییە نەک دەستوور.

حاکم شێخ لەتیف، یاسا ناس و پەرلەمانتاری پێشووی عێراق لە هەژماری تایبەتی خۆی لە تۆڕی کۆمەڵایەتی فەیسبووک رایگەیاند، دەستووری عێراق دەستوورێکی باشە، جا بەراورد بە وڵاتانی ناوچەکە و جیهانیش، بەڵام کێشەی عێراق گەندەڵی و پشکپشکێنەیە نەک دەستوور.

ئەو یاسا ناسە دەڵێت، بە ئەجێندا گۆڕینی دەستوور تێکەڵ بە داواکانی خۆپیشاندەران کراوە، دەستوورەکە هەم مافەکانی خەڵکی عێراقی تێدایە، هەم چەند گرەنتییەکی بۆ خەڵکی هەرێمی کوردستان دەستەبەرکردووە.

سەبارەت بە داوای خۆپیشاندەران بۆ گۆڕینی دەستوور، حاکم شێخ لەتیف دەڵێت "باشی و خراپی دەستوور بۆ کەسی تەکنیکییە لە بوارەکەدا و دەستووری عێراق نەک بەراورد بە دەستووری وڵاتانی ناوچەکە، بەڵکو بەراورد بە وڵاتانی جیهانیش دەستوورێکی پێشکەوتووە. ئەو سیستەمەش لە دەستووردا هەیە دیموکراسییە".

بە گوتەی ئەو یاسا ناسە، داواکاری خۆپیشاندەران رەوایە و مافی خۆیانە، بەڵام ئەوانیش تێوەگلێندراون لە یارییەک کە بەشێک لە دەوڵەتانی ناوچەیی ئەم دەستوورەی عێراقیان پێ هەزمناکرێت و وا وێناکراوە لەبەرچاوی خۆپیشاندەران کێشەکانی عێراق دەستوورن.

سەبارەت بە رۆڵی سەرۆککۆماری عێراق، حاکم شێخ لەتیف دەڵێت، سەرۆککۆمار پارێزەری دەستوورە و پێویستە بەرگری لەو دەستوورە بکات، بۆ خەڵکی روونبکاتەوە ئەوە دەستوورێکی باشە، لەنێو ئەو گەندەڵییانەی لە عێراق هەن، هەر دەستوورێک بهێندرێت بەو شێوەیە دەبێت.

لەبارەی هەڵوێستی پەرلەمانتارانی کورد دەڵێت، دەبێت ئەوانیش رازی نەبن و بۆ خەڵکی روونبکەنەوە، چونکە هەموارکردنەوەی دەستوور بەپێی ماددەی 142 مەترسیی سەرهەڵدانی رق و کێشمەکێشمی لەنێوان گەلی کورد و عەرەب لێدەکرێت.

هەموارکردنەوەی دەستوور بەپێی ماددەی 142 بەشێوەیەکە پێویستە بە زۆرینەی دەنگی پەرلەمان پەسەندبکرێت و دواتر بخرێتە راپرسییەوە و زۆرینەی خەڵکی عێراق دەنگی پێبدات، بەڵام ئەگەر دوو لەسەر سێی دەنگدەرانی سێ پارێزگا رەتیانکردەوە ئەوا جێبەجێناکرێت.

حاکم شێخ لەتیف روونیکردەوە، ئەگەر زۆرینەی خەڵکی عێراق دەنگ بە هەموارکردنەوەی بدەن و سێ پارێزگاکەی هەرێمی کوردستان دەنگی پێنەدە، ئەوا کێشەی کورد کە پێشتر لەگەڵ حکومەتەکان بوو، ئێستا کێشەکە دەبێتە کێشەی نێوان گەلی کورد و عەرەب.

ئەو یاسا ناسە جەختدەکاتەوە کە هەموارکردنەوەی دەستوور ئەگەر هەر بکرێت "بەپێی ماددەی 126 بکرێت کە بۆ دۆخی ئاساییە و لایەنی باشی ئەوەیە دوای قبوڵکردنی لای پەرلەمان و خەڵکی عێراق، ئەگەر چەند ماددەیەک لەبەرژەوەندی هەرێمەکان نەبوو کە عێراق بەتەنها هەرێمی کوردستانی هەیە، ئەوکات دەتواندرێت ئەو ماددانە رەتبکرێنەوە کە لە بەرژەوەندی هەرێمی کوردستان نەبوونە. بەوشێوەیەش خەڵکی عێراق هەموارنەکردنەوەی ناخەنە ئەستۆی کورد و کورد وەکو ئاستەنگی بەردەم چاکسازی نابینن".