دۆناڵد تره‌مپ، سه‌رۆكی ئه‌مه‌ریكا له‌ تویتیكی نوێدا دووپاتیكرده‌وه‌، په‌یوه‌ندییه‌كی ته‌له‌فۆنیم له‌گه‌ڵ مه‌زڵوم عه‌بدی، فه‌رمانده‌ی هێزه‌كانی سووریای دیموكراته‌وه‌ كرد و جه‌ختیشی كرده‌وه‌، ئێستا كاتی ئه‌وه‌ هاتووه‌ كورد به‌ره‌و ئه‌و ناوچانه‌ بچن، كه‌ كێڵگه‌ نه‌وتییه‌كانی لێیه‌.

تره‌مپ له‌ تویته‌كه‌یدا نوسیویه‌تی: "ئه‌و چێژی له‌ گفتوگۆكه‌ی له‌گه‌ڵ عه‌بدی وه‌رگرتووه‌"، جه‌ختیشی كرده‌وه‌، "سه‌ركرده‌ی هه‌سه‌ده‌ رۆڵی ئه‌مه‌ریكای به‌ گرنگ وه‌سف كردووه‌".

سه‌رۆكی ئه‌مه‌ریكا باسی ئه‌وه‌شی كرد، "به‌هیچ شێوه‌یه‌ك رێگه‌ به‌ داعش ناده‌ن جارێكی دیكه‌ ده‌ست به‌سه‌ر ئه‌و بیره‌ نه‌وتیانه‌دا بگرنه‌وه‌".

تره‌مپ گوتیشی: "ئه‌و كێڵگه‌ نه‌وتیانه‌ی باسیان ده‌كه‌م، پێشتر له‌ ده‌ست چه‌كدارانی داعش بوون، تا ئه‌و كاته‌ی ئه‌مه‌ریكا به‌ هاوكاری هێزه‌ كوردیه‌كان رزگاریان كردن".