بەڕێوەبەری كۆچ و كۆچبەرانی سۆران دەڵێت، پێشبینی هاتنی ئاوارە و لێقەوماوانی رۆژئاوای كوردستان دەكەین بۆ سنوورەوكەمان، بۆ ئەم مەبەستە خەریكی رێكخستنەوەی كەمپێكی ئاوارەكانین.

عەباس ئەمیر، بەڕێوەبەری كۆچ و كۆچبەرانی سۆران، رایگەیاند، دوای هێرشی توركیا و ئەم بارودۆخەی لە رۆژئاوای كوردستان هاتووەتە ئاراوە، پێشبینی ئەوە دەكەین كە لێقەوماوانی رۆژئاوایی كوردستان روو لە دەڤەری سۆرانیش بكەن، هەروەك لەلایەن ئەم خێزانانەی كە پێشتر هاتوونەتە ناوچەكەمان و تا ئێستا ماونەتەوە، پێیان راگەیاندووین كە خزم و ناسیاوەكانیان بە رێگاوەن بۆ هاتنیان بۆ دەڤەری سۆران".

گوتیشی: "بۆ ئەم مەبەستە خەریكین بە ئامادەكاری و رێكخستنەوەی كەمپی ئاوارەكانی (بانە زێوكە) لە سنووری رواندز، كە پێشتر ئاوارەكانی ئێزدی لێی نیشتەجێ بوون، شوێنی زیاتر لە 70 خێزان دەبێت، هەروەها لەگەڵ (UN) و رێكخراوە خێرخوازەكان و لایەنە پەیوەندیدارەكانی حكوومەت لە گفتوگۆ داین كە چۆن بتوانین پێشوازی لەو لێقەوماوانە بكەین و هاوكارییان بکەین".

بەڕێوەبەری كۆچ و كۆچبەرانی سۆران، ئەوەشی ئاشكرا كرد خەڵكی دەڤەری سۆران بە هەڵوێست و میواندۆستن و لە كاتی ئەمجۆرە رووداوانە چەندین ئاوارە و لێقەوماو لەخۆ دەگرن و شوێنیان بۆ دەكەنەوە و هاوكارییان دەكەن.









باسنیوز