دهۆك.. هژمارەكا پرۆژەیان دێ ژ وەبەرهێنەران هێنە وەرگرتن
رێڤەبەرێ گشتیێ وەبەرهێنانێ ل پارێزگەها دهۆكێ راگەهاند، ژ ئەگەرێ خەمساریا هندەك وەبەرهێنەران، پرۆژە دێ ژ وان هێنە وەرگرتن و دەینە دەستێ هندەك وەبەرهێنەرێن دی.
ئەندازیار كوردو ئیحسان، رێڤەبەرێ گشتیێ وەبەرهێنانێ ل پارێزگەها دهۆكێ دیار كر، پرۆژەیێ گەشتیاری یێ ب ناڤێ (شاری یاری سەردەم) ل قەزا ئاكرێ نها هاتیە راگەهاندن بۆ هندێ هەر وەبەرهێنەرەكێ بخوازیت ڤی پرۆژەی وەربگریت قەستا رێڤەبەریا مە بكەت و ناڤێ خوە تۆماربكەت، چونكو ئەڤ پرۆژە بەری نها ب نیڤەرۆ مایە و پێدڤیە وەبەرهێنەرەكێ خودان شیان بهێت پرۆژەی ب دووماهی بینیت.
ئاشكرا ژی كر كو ئەڤ پرۆژەیێ قەزا ئاكرێ هۆتێلەكا پێنچ قاتی و 44 مۆتێلان و خارنگەهەكێ دوو قاتی و هۆلا هەلكەفتان و باخچەكی ب خۆڤە دگرن و ماوێ پێشكێشكرنێ 30 رۆژان و گۆتیشی: چەند پرۆژەیێن شوقا ژی دێ رادەستی هندەك وەبەرهێنەرێن دیتر كەین و نۆكە كاری تێدا دەستپێكریە و گرێبەستێن خەلكی ژی دێ هێنە نووكرن.
كوردو ئاماژە ب هندێ ژی دا كو كابینا نوو یا حكومەتا هەرێما كوردستانێ 20 پرۆژەێن وەبەرهێنانێ یێن ب نیڤرۆ ماین ل پارێزگەها دهۆكێ هەلوەشاندینە كو بێ ئەگەر كار د چێكرنا وان دا هاتبوو راگرتن و ل گەل باشتربوونا رەوشا دارایی ژی، نێزیكی 40 پرۆژەیێن دی دێ مۆلەتێن كاركرنێ وەرگرن و نها كار د پرۆسەیا وەرگرتنا مۆلەتێن وان پرۆژەیان دا دهێنە كرن.
باسنیوز
