حکوومەتی هەرێمی کوردستان بۆ تاوتوێکردنی بارودۆخی رۆژئاوای کوردستان دوای هێرشی سوپای تورکیا، لەگەڵ نوێنەرایەتیی وڵاتان لە هەولێر، کۆ دەبێتەوە.

کۆبوونەوەکە دوای نیوەڕۆی ئەمڕۆ سێشەممە 15-10-2019 بە سەرپەرشتیی رێبەر ئەحمەد، وەزیری ناوخۆ و ئامادەبوونی سەفین دزەیی، بەرپرسی فەرمانگەی پەیوەندییەکانی دەرەوەی حکوومەت، دەستی پێ کرد.

لەو کۆبوونەوەیەدا، وەزیری ناوخۆ و کونسوڵ و نوێنەرانی 24 وڵات لە هەولێر، تاوتوێی دوایین پێشهاتەکان و بارودۆخی رۆژئاوای کوردستان دەکەن.

ئامادەکاریی حکوومەتی هەرێمی کوردستان بۆ ئەگەری ئاوارەبوونی هاووڵاتییانی رۆژئاوای کوردستان بۆ باشووری کوردستان و هاوکاریی وڵاتان، تەوەرێکی دیکەی کۆبوونەوەکە دەبن.

ئەمڕۆ سێشەممە 15-10-2019، ئیدارەی خۆجێیی رۆژئاوای کوردستان لە بەیاننامەیەکدا رایگەیاندبوو، 275 هەزار هاووڵاتیی مەدەنی بەهۆی هێرشی سوپای تورکیاوە، ئاوارە بوون.

رۆژی چوارشەممە 9-10-2019، بە سەرپەرشتیی رەجەب تەییب ئەردۆغان، سەرۆک کۆماری تورکیا، هێرشی زەمینی و ئاسمانیی سوپای تورکیا و گرووپە توندڕەوەکانی ئۆپۆزیسیۆنی سووریا بۆ سەر رۆژئاوای کوردستان، دەستی پێ کرد.









باسنيوز