ل دهۆكێ 150 بۆتلێن خوینێ بو رۆژئاڤایێ كوردستانێ هاتن كومكرن
عادل عەبدولسەلام، رێڤەبەرێ بەنكا خوینێ ل دهۆكێ د داخویانیەكێ دا گوت: سپێدەهیا ئەڤرۆ رۆژا ئێك شەمبی رێكەفتی 13/10/2019 ، هژمارەكا زور یا خەلكی وەكو پشتەڤانی بو رۆژئاڤایێ كوردستانێ قەستا مە كریە و خوین بەخشیە.
هەمان رێڤەبەری ئەو چەندە ژی دیار كر: پتریا وان كەسێن قەستا مە كرین رۆژنامەڤان و ماموستاو چالاكڤان بوینە دگەل هژمارەكا فەرمانبەرا و خەلكێ سڤیل و پێشمەرگەیان كو خواستیە وەكو وەفاداری بو كوردێن رۆژئاڤایێ كوردستانێ خوینا خو ب بەخشن و بو هەر رویدانەكا نەچاڤەرێكری خوین یا بەرهەڤ بیت.
رێڤەبەرێ بەنكا خوینێ دوپاتكر ژی: ژ سپێدەهیا ئەڤرۆ تا نیڤرۆ (150) بوتلێن خوینێ ژلایێ خەلكێ مە ڤە ل بەنكا خوینێ لنك مە هاتنە كومكرن و هەر دەمێ رێك بهێتە دان ئەم د بەرهەڤین ئەوێ خوینێ بو نەخوشخانێن رۆژئاڤای بهنێرین یان هەر رویدانەكا دی یا نەچاڤەرێكری بیت ئەو خوینە ل بەنكا مە دا یا هەلگرتی و پاراستیە بو رۆژئاڤایێ كوردستانێ.
ژ لایەكێ دیتر ڤە ، رۆژنامەڤان ،یوسف ئەحمەد سمكو، كو رێكخەرێ ئەوێ هەوا خوین بەخشینێ بویە بو (باسنیوز) دوپاتكر: راستە مە ئەڤ هەوا خوین بەخشینێ بو كوردێن رۆژئاڤا ئەنجام دان و ئەڤ چالاكیا مە دوماهی نابیت بەلكو دێ بەردەوام بین بو خزمەتكرنا خەلكێ مە یێ رۆژئاڤا و گوت ژی: د خوین بەخشینا ئەڤرۆ دا هژمارەكا زور یا خەلكی كو ماموستا و پێشمەرگە و رۆژنامەڤان و فەرمانبەر و چالاكڤان و خەلكێ مەدەنی پشكدار بوینە و هەمی دلخوش بوین ب دانا خوینا خو بو كەسێن پێتڤی و ئەم دخازین وەك گەنج و رۆژنامەڤان پتر كارێن پێتڤی بكەین ژ پێخەمەت خزمەتكرنا كوردێن خو یێن رۆژئاڤا چونكە (دل و گیانێ) مە ئێكە.
باسنیۆز
