بەهۆی هێرشی سوپای تورکیا بۆ سەر رۆژئاوای کوردستان، مەترسیی هەڵاتنی سێ هەزار و 500 چەکداری عێراقیی سەر بە رێکخراوی تیرۆریستی داعش لە گرتوخانەکانی هێزەکانی سووریای دیموکراتی (هەسەدە) هەیە.

ئەو چەکدارە عێراقییانەی داعش لەلایەن هێزەکانی هەسەدەوە لە سووریا دەستگیر کراون و بەشێکیان لە کەمپی هۆل و بەشێکیشیان لە گرتووخانەکان، دەستبەسەر کراون.

بەهۆی سەرقاڵبوونی هێزەکانی هەسەدە بە بەرپەرچدانەوەی هێرشی سوپای تورکیا بۆ سەر رۆژئاوای کوردستان، مەترسیی هەڵاتنی ئەو چەکدارە داعشانە هەیە.

ئەمڕۆ یەکشەممە 13-10-2019، فۆژنامەی (سەباح)ی فەرمیی عێراقی بڵاوی کردووەتەوە، کە تا ئێستا هەسەدە یەک هەزار و 500 چەکداری عێراقیی داعشی رادەستی ئەو وڵاتە کردووەتەوە.

ئەبو عەلی ئەلبەسری، بەڕێوەبەری گشتیی هەواڵگریی وەزارەتی ناوخۆی عێراقی رایگەیاندووە، ئەو چەکدارانە خاڵێکی هەڕەشەن بۆ سەر ئاسایشی عێراق و ناوچەکە و جیهان بە گشتی.

رۆژی چوارشەممە 9-10-2019، بە سەرپەرشتیی رەجەب تەییب ئەردۆغان، سەرۆک کۆماری تورکیا، هێرشی زەمینی و ئاسمانیی سوپای تورکیا و گرووپە توندڕەوەکانی ئۆپۆزیسیۆنی سووریا بۆ سەر رۆژئاوای کوردستان، دەستی پێ کرد.

هەسەدە هێزێکی سەربازییە و بە پشتیوانیی ئەمریکا بۆ رزگارکردنەوەی ناوچە داگیرکراوەکانی رۆژئاوای کوردستان و سووریا لە رێکخراوی تیرۆریستی داعش، پێکهاتووە. یەکینەکانی پاراستنی گەل (یەپەگە)ی باڵی سەربازیی پارتی کرێکارانی کوردستان (پەکەکە) لە رۆژئاوای کوردستان باڵی سەرەکیی ئەو هێزەیە.










باسنيوز