وه‌كو دلسۆزى بۆ خه‌لكێ رۆژئاڤایێ كوردستانێ، سپێده‌هیا ئه‌ڤرۆ رۆژا شه‌مبى رێكه‌فتێ 12/10/2019، هژماره‌كا زۆر یا خه‌لكێ باژێرێ دهۆكێ ل پاركا نه‌ورۆز ل سه‌نته‌رێ باژێرى كۆمبوون و دلگرانیا خو ل هه‌مبه‌ر كریار و هێرشێن سوپایێ توركیا بۆ سه‌ر رۆژئاڤایێ كوردستانێ دا دیاركر و هه‌ر ئه‌ڤرۆ رێكخراوێن نه‌ حكومى ل دهۆكێ ب نوینه‌رایه‌تیا خه‌لكێ دهۆكێ به‌یاننامه‌یه‌ك به‌لاڤ كر.

لاوین سه‌ورى، ئێك ژ چالاكڤانێن پارێزگه‌ها دهۆكێ دا دیاركرن: "د خرڤه‌بونا ئه‌ڤرۆ دا هژماره‌كا زۆر یا خه‌لك و رۆژنامه‌ڤان و چالاكڤان و مامۆستایان پشكدار بوونه‌ و مه‌ره‌ما مه‌ ژئه‌ڤێ خرڤه‌بونێ ئه‌وه‌ كو ب گیانێ خو ڤه‌ دلگرانین به‌رامبه‌ر هێرشێن سوپایێ توركیا براوه‌ستینیت و بهێته‌ سه‌ر مێزا دانوستاندنێ تاكو كێشه‌ چاره‌سه‌ر ببیت و دیسان فه‌ره‌ نه‌ته‌وه‌یێن ئێكگرتى رۆلێ خۆ بو چاره‌كرنا كێشێ ببینن".

هه‌مان چالاكڤانى ئه‌و چه‌نده‌ ژى گۆت: "دڤێت سه‌رۆكێ ئه‌مریكا ب چاڤێ بازرگانیكرنێ ته‌ماشه‌ى كوردان نه‌كه‌ت چونكه‌ كورد مه‌زنترین هێز بوویه‌ د شكاندنا چه‌كدارێن توندره‌و یێن داعش و كوردان رۆله‌كێ ئێكجار مه‌زن د ده‌ڤه‌رێ دا هه‌یه‌. ئه‌ڤرۆ ئه‌م وه‌ك خه‌لكێ دهۆكێ ب گیانێ خو ڤه‌ دگه‌ل كوردێن رۆژ ئاڤاى نه‌ وئه‌م دخازین ده‌رگه‌هێ دانوستاندنێ دناڤبه‌را هه‌ر لایه‌نه‌كێ دا بهێته‌ ڤه‌كرن و نا خازین سه‌دان گه‌نج و ژن و زارۆك ئاواره‌ و ده‌ربه‌ده‌ر ببن و ئه‌گه‌ر ره‌وش بگه‌هیته‌ ئه‌ڤێ چه‌ندێ ده‌رگه‌هێ مالێن مه‌ بۆكوردێن برایێن مه‌ یێن رۆژئاڤا یێ ڤه‌كریه‌ لێ دخازین خوینا كه‌سێ نه‌ رژیت و گۆت ژى: ئه‌م وه‌كو رێكخراوێن نه‌ حكومى و چالاكڤان و رۆژنامه‌ڤان دێ ل سه‌ر پشته‌ڤانیا خۆ بۆ كوردێن رۆژئاڤا به‌ رده‌وام بین چونكه‌ خوینا وان خوینا مه‌یه‌ و دلگرانین ب رژتنا دلۆپه‌كا خوینێ".










باسنيوز