دوانیوەڕۆی ئەمڕۆ لەبەردەم بارەگای نەتەوە یەکگرتووەکان لە هەولێر گردبوونەوەیەکی ناڕەزایی ساز کرا و تێیدا بە توندی ئیدانەی لەشکرکێشیی سوپای تورکیا بۆ سەر ڕۆژئاوای کوردستان کرا.

لە گردبوونەوەکەدا جیاواز لە جەماوەرێکی زۆر لە خەڵکی هەولێر و ڕێکخراوەکانی کۆمەڵگەی مەدەنی، هاوکات پەنابەر و ئاوارەکانی ڕۆژئاوای کوردستان لە هەرێم ئامادە بوون و بە هەڵگرتنی کۆمەڵێک نووسراو لافیتە گردبوونەوەیەکی ناڕەزاییان ساز کرد و داوایان لە نەتەوە یەکگرتووەکان و کۆمەڵگەی نێودەوڵەتی کرد تورکیا هێرشەکانی بۆ سەر ڕۆژئاوای کوردستان ڕابگرێت.

هاوکات لەگەڵ گردبوونەوەی ناڕەزایی خەڵک لە شارەکانی هەرێمی کوردستان، هاوکات لە باکوور و چەند وڵاتی ئەورووپی کوردانی تاراوگەش گردبوونەوەی ناڕەزاییان ساز کرد و هێرشی تورکیایان ئیدانە کردووە.

لە ئاستی نێودەوڵەتیشدا ٢٨ وڵاتی ئەورووپی، ئەرمەنستان و ئوسترالیا و نزیکەی ١٠ وڵاتی عەرەبی ئەو هێرشەی تورکیایان بۆ سەر ڕۆژائاوای کوردستان ئیدانە کردووە و داواین کردووە دەستبەجێ ئەو هێرشانە ڕابگیرێت.

لایەنە سیاسییەکانی هەرێمی کوردستان بڕیارەیان داوە ڕۆژی شەممە خۆپیشاندانی فراوان لە شارەکانی هەرێمی کوردستان ساز بکرێت و بە شێوەیەکی مەدەنیانە ئەو هێرشەی تورکیا ئیدانە بکرێن.

بەگوێرەی زانیارییە میدیاییەکان سوپای تورکیا بە هاوکاریی سوپای ئازادی سووریا کە لەلایەن تورکیاوە پاڵپشتیی دەکرێن، بەتەمان بچنە ناو گوندەکانی "سەرێکانی" و لەلایەن هێزەکانی سووریای دیموکراتەوە بەرپەرچیان دراوەتەوە و شەڕەکە هەتا دێت توندتر دەبێت و بوردمانی فڕۆکەکانی تورکیا لە سنوورەکانی کۆبانێ و سەرێکانی بەردەوامە و هەم لە هێزی شەڕەڤانان و هەم لە خەڵکی سڤیل شەهید و بریندار هەیە.

ڕوانگەی سووری سووری بۆ مافەکانی مرۆڤ لە سووریا بڵاوی کردووەتەوە هەتا بەیانیی ئەمڕۆ ١٥ کەس شەهید بوون و ٤٥ کەسیش بریندار بوون، بەڵام ئەمڕۆش شەڕ و پێکدادان بەردەوام بووە و هەتا ئێستا دوایین ئامار لەبارەی قوربانییەکان دیار نییە.










باسنيوز