ئاسایشی رۆژئاوای سلێمانی و پۆلیسی چەمچەماڵ ‏لە ماڵێکدا دەستیان بەسەر ‏36 دەمانچە و دوو کیلۆ تی ئێن تی دا گرت، کە خاوەنەکەی بەنیازی ساخکردنەوە و بازرگانیکردن پێوەی لە ماڵەوە هێشتبوونیەوە.

ئاسایشی رۆژئاوای سلێمانی ‏ئەمڕۆ چوارشەممە ‏بڵاویکردەوە، ‏"لەرێگەی سەرچاوە ئەمنییەکانی خۆمانەوە ‏زانیاریمان پێگەیشت کە لەماڵێکدا لەسەنتەری قەزای ‏چەمچەماڵ ‏کەسێک خەریکی ساخکردنەوە و ‏بازرگانیکردن بە ‏کەلوپەلی سەربازی و نایاساییە و دەستبەجێ ‏هێزەکانمان بەهاوبەشی پۆلیسی ‏فریاکەوتنی ‏چەمچەماڵ گەمارۆی ماڵەکەیاندا و دەستیان ‏گرت بەسەر ‏تەواوی کەلوپەلە نایاساییەکاندا".

ئاسایشی رۆژئاوای سلێمانی ‏ئاماژەی بەوە کردووە، لەو ‏ماڵەدا دەستگیراوە بەسەر 36 دەمانچە، دوو کیلۆ تی ئێن تی سی فۆڕ، هەشت مەخزەن و 120 فیشەکی کڵاشینکۆف لەگەڵ دوو کەبسولی نارنجۆک و تاپڕێک.

بە گوتەی ئاسایشی رۆژئاوای سلێمانی، ئێستا ‏سەرجەم ‏کەلوپەلەکان بەبڕیاری دادوەر دەستیان ‏بەسەردا گیراوە و کەسی بازرگانیش هەڵاتووە.