دوای ئەوەی مانگی رابردوو وەزارەتی شارەوانی و گەشتوگوزاری هەرێمی کوردستان بۆ رێکخستنەوەی دەسەڵاتەکانیان، کاری ئەنجوومەنی شارەوانییەکانی هەڵپەسارد، ئەنجوومەنی شارەوانییەکانی هەرێمی کوردستان جارێکی دیکە بە کۆمەڵێک دەسەڵاتی دیاریکراوەوە کاراکرانەوە.

کاراکردنەوەی ئەو ئەنجوومەنانە به‌پێى بڕیارێكى وه‌زاره‌تى شاره‌وانییە كه‌ گشتاندنى بۆكراوه و تێیدا هاتووە، ئەنجوومەنی شارەوانییەکان دەسەڵاتەکانیان دیاریکراوە کە بریتین لە: تەرخانکردنی زەوی بۆ هاونیشتمانییان، گۆڕینی رەگەزی زەوی، گۆڕینی بەکارهێنانی شوێن و پەسەندکردنی نەخشەی زەوی.

له‌ ساڵى 2017ـەوه‌ وه‌زاره‌تى شاره‌وانى و گەشتوگوزار پرۆژه‌یه‌كى په‌سه‌ندكردووه‌، بۆ شێوازى هه‌ڵبژاردنى ئه‌نجوومه‌نى شاره‌وانییه‌كان به‌ دامه‌زراندن، به‌ جۆرێك 40%ـی ئه‌ندامانیان ده‌بێت فه‌رمانبەرى حكومى بن، 60%ـیش نوێنه‌رى رێكخراوه‌كانى كۆمه‌ڵگه‌ى مه‌ده‌نى بن.

بۆ نوێكردنه‌وه‌ى ده‌سه‌ڵاتى ئه‌مجاره‌ی ئەنجوومەنی شارەوانییەکان، ئه‌نجوومه‌نى پارێزگاى سلێمانى هه‌م دژه‌ و هه‌میش سه‌رى له‌و بڕیاره‌‌ى وه‌زاره‌ت سوڕماوە.

ئه‌ندامانى ئه‌نجوومه‌نى شاره‌وانییه‌كانى هه‌ولێر، 18 كه‌سن، سلێمانى و دهۆك هه‌ر یه‌ك 17، به‌ڵام هه‌ندێك له‌وانه‌ ئێستا له‌ ژیاندا نه‌ماون، مووچه‌ و ده‌رماڵه‌ى ئه‌ندامانیشیان له‌سه‌ر فه‌رمانگه‌كه‌ى خۆیانه‌ نه‌ك شاره‌وانى، ئه‌وانه‌شى كارمه‌ندنین، یان وازیان هێناوه‌ یان خۆبه‌خشن.

ئەنجوومەنی شارەوانییەکانی هەرێمی کوردستان ساڵی 2000 هەڵبژێردراون و ماوەی 19 ساڵە هەڵبژاردن بۆ ئەو ئەنجوومەنە نەکراوە.