گوته‌بێژی وه‌زاره‌تی بازرگانیی حکوومەتی هه‌رێمی كوردستان رایدەگەیەنێت، حكومه‌تی عێراق بڕیار لەسەر ناردنی بڕێک لە قەرزی جووتیارانی هەولێر، دەدات.

فەتحی محەمەد، گوتەبێژی وه‌زاره‌تی بازرگانی و پیشه‌سازی راگەیاند، بڕیارە ”لەم هه‌فته‌یه‌“ بانكی ناوەندیی عێراق بڕیاری کۆتایی لەبارەی ناردنی پاره‌ی گه‌نمی جوتیارانی هه‌ولێر بدات و پارەکە بنێرێت.

فەتحی محەمەد هەروەها رایگەیاند، چەکی پارەکان ئامادەیە و تەنیا چاوەڕوانی پارەکەن بگات و دواتر ”بەپێی خشتەیەک دەست بە دابەشکردنی دەکەین“.

هه‌روەها محه‌مه‌د ده‌شتی، سه‌رۆكی كۆمه‌ڵه‌ی جوتیارانی هه‌ولێر راگەیاند، بەپێی رێككه‌وتنی هەولێر و بەغدا، تا کۆتایی ساڵی داهاتوو هەموو پارەی قەرزی جووتیاران دەدرێتەوە.

محەمەد دەشتی جەختی لەوەش کردەوە، کە پارەکە بە چەند بەشێک لە بەغداوە دەنێردرێتە هەولێر و بەسەر جووتیاران دابەش دەکرێت.











باسنيوز