پۆلیسی هەولێر رایدەگەیێنێت، ئەمڕۆ ئەو کەسەیان دەستگیرکردووە کە 15ـی ئەم مانگە لە گوندی مورتکە دایکی خۆی کوشت و دواتر هەڵاتبوو.

ئەو کەسەی تۆمەتبارە بە کوشتنی دایکی خۆی ناوی ‏(خ.ا.ظ)ـە، تەمەنی 19 ساڵانە و بەرەچەڵەک عەرەبە، دوای رووداوەکەش بۆ شارۆچکەی شەرگات لە نەینەوا هەڵاتووە.

عەبدولخالق تەلعەت، بەڕێوەبەری پۆلیسی هەولێر راگەیاند: ئەو کەسە هەڵاتبوو بۆ شارۆچکەی شەرگات و دوای گەڕانەوەی بۆ هەولێر دەستگیریان کردووە.

بە گوتەی پۆلیس، تۆمەتبارەکە دانی بەوەدا ناوە بەهۆی دەستکاریکردنی دەمانچەکەیەوە فیشەک لە دەستی دەرچووە و بەر دایکی کەوتووە، بەڵام لێکۆڵینەوەکان هێشتا بەردەوامن و بڕیاری کۆتایی لەسەر نەدراوە.

ئێستا پەڕاوی لێکۆڵینەوە بۆ رووداوەکە کراوەتەوە و ئەو کەسە بەپێی بڕیاری دادوەر و بەماددەی 405 لە یاسای سزادانی عێراقی دەستگیرکراوە.