سەرۆكێ‌ جڤاتا قەزا شنگال دیار كر پشتی مەحما خەلیل بوویە راوێژكارێ پەرلەمانێ‌ كوردستانێ‌ ودەمێ‌ دەست ژ كار ڤەكێشانا خوە پێشكێش دكەت ئەم دێ‌ كەسەكی‌ ل جهێ‌ وی دانن ب دلێ هەموو خەلكێ‌ شنگال بیت.

وەیس نایف، سەرۆكێ‌ جڤاتا قەزا شنگال دیار كر: "ئەم چاڤەرێنە وەختەكێ‌ نێزیكدا قایمقامەكێ‌ نوو بۆ شنگال بهێتە دانان ب رێكەڤتن بیت ناڤبەرا هەرێما كوردستانێ‌ و حكومەتا عێراقی دا ب مەرجەكێ‌ ژی كەسەك بهێتە دانان ب دلێ هەموو خەلكێ‌ شنگال بیت وهەموو ژی درازی بن. مەرج نینە ژی كەسەكێ‌ پۆستێ قایمقامیا شنگال وەردگریت ئەندامێ‌ جڤاتا شنگال بیت بەلكو هەر كەسەكێ‌ ئاكنجیێ شنگال بیت ماف هەیە ببیتە قایمقام ل گۆر هندەك مەرج ورێنمایان یا ژ هەموو گرنگتر ژی كەسەكێ‌ دەستپاك بیت".

خویا ژی كر: "هەموو هەولێن مە ئەوە رەوشا شنگال بهێتە ئاساییكرن و ئیدارا شنگال بچتە ناڤ بارەگایێ خوە دا ل شنگال، دەست ب ئاڤەدانیێ و خزمەتێ بهێتە كرن".

ل 3/8/2014 تیرۆرستێن داعش شنگال داگیركرن وپێشمەرگەهێ كوردستانی ب سەرپەرشتیا سەرۆك بارزانی شنگال رزگاركرن. هیڤیەك مەزن بۆ خەلكێ چێبوو بزڤرنە شنگال لێ پشتی روودانێن 16 ئوكتوبەرێ جارەكا دی رەوش ل شنگال هاتە تێكدان. هەتا نۆكە پتر ژ 80% خەلكێ‌ شنگال ئاوارانە ل 17 كەمپان سنۆرێ دهۆكێ‌ دژین و رێگری ل زڤرینا ئیدارا شەرعی شنگال هاتیە كرن نەچوویە شنگال.









باسنيوز