لێپرسراوی كەرەنتینەی كشتوكاڵی بەڕێوەبەرایەتیی كۆمەڵگەی دەروازەی نێودەوڵەتیی باشماخ، گەڕاندنەوەی زیاتر لە 40 تۆن سێوی خراپبووی بۆ وڵاتی ئێران ڕاگەیاند.

بەهێز عەبدوللەتیف، لێپرسراوی كەرەنتینەی كشتوكاڵی بەڕێوەبەرایەتیی كۆمەڵگەی دەروازەی نێودەوڵەتیی باشماخ ڕايگەیاند: "دوێنێ سێشەممە 30/7/2019 لەلایەن فەرمانگەی كەرەنتینەی كشتوكاڵی دەوازەی نێودەوڵەتیی باشماخەوە ڕێگری لە هاوردەكردنی زیاتر لە 40 تۆن سێوی سووری ئێرانی بۆ هەرێمی كوردستان كراوە كە لەنێو 2 ترێلەدا بووە".

گوتیشی: "سێوەكان لە شارێكی دووری ئێرانەوە هێنرابوو و پاش 18 كاتژمێر ڕێگە، گەیشتبووە دەروازەكە و بەهۆی كۆنیی سێوەكەوە و هەڵنەگرتنی بە شێوەیەكی باش لە كۆگاكانی ئەو وڵاتە، زۆرینەی مێروو لێی دابوو و كەڕووی هێنابوو".

ئاماژەی بەوەش دا: "شۆفێری ئۆتۆمبێلەكانیش پابەند نەبوون بە ئیشپێكردنی بەڕاوی ناو ئۆتۆمبێلەكانیان و دیاریكردنی پلەی پێویست بۆ بەرهەمی سێو، بۆیە نووسراوی گەڕانەوەی بۆ كراوە بۆ وڵاتی ئێران".











باسنيوز