ئاوارێن ئێزدی ل كەمپێن پارێزگەها دهۆكێ‌ دبێژن ئەم نەوێرن زارۆكێن خوە ببەینە شنگال ، هەر كەسەكێ‌ ڤێ‌ رەوشێ دا بچتە شنگال ژی پشتی چەند رۆژان دووبارە شنگال بجه دهێلن دزڤرنە دهۆكێ‌.

مەیادین شنگالێ‌، ژنەكا ئاوارە ئێزدی دژیێ 50 سالی دا ل كۆمەلگەها شاریا سەر قەزا سێمێلێ ڤە دژیت، دیار كر: "هەكە پێشمەرگەه بزڤرتە شنگال ئەم ژی دبەرهەڤن دگەل پێشمەرگەهی ڤەگەرینە شنگال چونكو دێ‌ تەناهی دروست بیت. چوو مەترسی لسەر ژیانا مە نامینت. ئەم نەوێرن زارۆكێن خوە ببەینە شنگال ژبەر رەفتارێن گرۆپ ولایەنێن چەكدار. ئەم ژ زڤرینا شنگال بێ‌ ئومید بووینە. ئەڤە پێنچ سالن ئەم ژ شنگال ئاوارەی دهۆكێ‌ بووین هەتا ۆبەغدا دهاوارا مە نەهاتیە".

خویا ژی كر: "هەڤژینێ من كەسەكی‌ دانعەمر بوو پتر ژ هەشت هەیڤان بن دەستێ تیرۆرستێن داعشی دا ما ب پشتەڤانی و هەڤكاریا حكومەتا هەرێما كوردستانێ‌ بتایبەتی ژی نڤیسینگەها رزگاركرنا رەڤاندییان هاتە رزگاركرن هەتا نۆكە ژی هژمارەكا كەس وكارێن هەڤژینێ من دەستێ تیرۆرستێن داعش دا ماینە وچارەنڤیسێ وان دیار نینە".

عەیدۆ حسێن خەلەف، ئێكە ژ ئاوارێن شنگال، دیار كر: "رەوشا شنگال گەلەك خرابە. من نۆكە نەڤێت بچمە شنگال. ئەم نەوێرن زارۆكێن خوە ژی ببەینە شنگال. ئەم خەلكێ‌ تل قەسەبن ل شنگال هەتا نۆكە خانیێن مە نەهاتینە پاقژكرن ژ مین وتەقەمەنیێن تیرۆرستێن داعش هەروەسا ژی خزمەتگوزاری ژی نینن. نۆكە ژی عەرەب یێن زڤرینە دەڤەرێ پتر مەترسی یا دروستبووی لسەر ژیانا خەلكێ‌ مە. نەشێن وەسا ڤەگەرن چونكو ئەو كەسێ بوویە داعش یێ‌ زڤرتە شنگال دێ چەوا هەڤكاری كەن بۆ تەناهیا رەوشا شنگال دێ پتر رەوشێ تێك دەن".

ندوا حەسەن، كچەكا ئاوارێن شنگال دیار كر: "ب هیچ رەنگەكێ‌ من نەڤێت جارەكا دی بزڤرمە شنگال دگەل كەسێن خیانەتكار بژیم. چاڤێ مە یێ ژ شنگال شكەستی، نەشێن جارەكا دی‌ لێ بژین چونكو عەرەبان دەستدرێژی لسەر كچ وژن و زارۆكێن مە كرن. هەتا نۆكە ژی ئەو خیانەتكارێن عەرەبان نەهاتینە دەستەسەركرن. ئەم دترسن ڤەگەرن وجارەكا دی هێرشی سەر مە بكەن. ئەم دخوازن پێشمەرگەهێ كوردستانێ‌ و دام ودەزگەهێن ئەمنی یێن كوردستانێ‌ بزڤرنە شنگال وهێز و گرۆپێن نە یاسایی شنگال چۆل بكەن".











باسنيوز