به‌ڕێوه‌به‌رایه‌تیی پۆلیسى سلێمانى له‌ ڕاگه‌یاندراوێكى فه‌رمیدا ئاماژه‌ به‌وه‌ ده‌دات، هێزه‌كانى پۆلیس هاووڵاتییه‌كیان ڕزگار كرد، كه‌ ده‌یویست خۆى بكوژێت.

ئه‌مڕۆ چوارشه‌ممه‌ 24/7/2019، به‌ڕێوه‌به‌رایه‌تیی پۆلیسى سلێمانى ئاگادارییه‌كى له‌ په‌یجى فه‌رمیی خۆى، له‌ تۆڕى كۆمه‌ڵایه‌تیی (فه‌یسبووك) بڵاو كرده‌وه‌، تێیدا هاتووه‌: "ئێوارەی دوێنێ دوای ئاگادارکردنەوەی هێزەکانی پۆلیس کە هاووڵاتییەک لە ماڵەکەی‌ خۆیدا دەیەوێت کۆتایی‌ بەژیانی‌ خۆی‌ بهێنێت، دەستبەجێ هێزەکانی بنکەی پۆلیسی ڕاپەڕین و پۆلیسی فریاکەوتن گەیشتوونەتە شوێنی‌ ڕووداوەکە و توانیویانە دەرگای ماڵەکە بکەنەوە و چەقۆکەی لێ بسەنن و ڕزگاری بکەن".

له‌ ڕاگه‌یاندراوه‌كه‌دا ئه‌وه‌ش خراوه‌ته‌ ڕوو، هاووڵاتییەکە ناوی (ر، ا)یه‌ و لەدایکبووی‌ 1998ه‌ و پیشەى کاسبە، بەپێی‌ وتەکانی‌ ناوبراو کێشەی‌ خێزانی‌ هەیە، بۆیە هەوڵی خۆکوشتنی داوە.

پۆلیسى سلێمانى ئاماژه‌ به‌وه‌ش ده‌دات، دوای ڕزگارکردنی لەلایەن مەفرەزەیەکی پۆلیسی فریاکەوتنەوە ڕادەستی بەشی توندوتیژی کراوە و لەلایەن بنکەی‌ پۆلیسی‌ ڕاپەڕینەوە پەڕاوی‌ لێکۆڵینەوە بۆ ڕووداوەکە کراوەتەوە.












باسنيوز