قاسم شەشۆ: عەرەبێن نەنیاس ژی یێن هاتینە دەڤەرا شنگال
قاسم شەشۆ، فەرماندێ فەرماندەیا شنگال یا پێشمەرگەهێ كوردستانێ دیار كر: "دەمێ پێشمەرگەهێ كوردستانێ شنگال بن دەستێ تیرۆرستێن داعش رزگاركری ئەو عەرەبێن بووینە داعش وپشتەڤانێن داعش هەموو رەڤین چوونە وەلاتێ سوریا، نۆكە پشتی ڤالاتیەكا مەزنا قانوونی و ئیداری وتەناهی ل شنگال دروستبووی، جارەكا دی ئەو عەرەب زڤرینە شنگال دگەل وان عەرەبان ژی چەندین عەرەبێن نەنیاس ونە ئاكنجیێن گوندێن دەڤەرێن سەر شنگال ڤە یێن زڤرینە دەڤەرا شنگال. هیچ لێپرسینەك دگەل وان دا ناهێتە كرن چونكو گەلەك ژ وان عەرەبان بووینە هەلگرێن ناسنامەیێن وان گرۆپ ولایەنێن دناڤ شنگالێ دا ب كەیفا خوە كار دكەن".
خویا ژی كر: "هەكە شنگال ڤالا نەبیت ژ گرۆپ وهێزێن نۆكە دناڤ شنگالێ دا، دێ رەوش ئالۆزتر و خرابتر لێ هێت، ب هیچ شیوەیەكێ خزمەتا شنگالیان ناهێتە كرن. دێ مەترسیی لسەر ژیانا ئێزدیان یا بەردەوام بیت دناڤ شنگالدا".
باسنيوز
