سەرۆکێ لقێ دھۆک یێ ئێکەتیێن کرێکارێن کوردستانێ راگەھاند، د ھەیاما شەش مەھان دا، ھەشت کرێکار ل پارێزگەھا دھۆکێ بووینە قوربانی و ژ وان ژی چوار کرێکاران گیانێ خوە ژ دەستدایە.

عیسا نسری، سەرۆکێ لقێ دھۆک یێ ئێکەتیێن کرێکارێن کوردستانێ دیار کر، د ئەڤ سالە دا چوار کرێکار ب روودانان برینداربووینە و چوار کرێکاران ژی گیانێ خوە ژ دەستدایە، لێ وەکو پێدڤی یاسایا دابینکرنا جڤاکی ئەوا ژمارە (39) ئەوا ل سالا 2012 دەرچووی ب شێوەکێ جدی ناھێتە بجھئینان، لەوما ئەو کرێکارێن د روودانان دا ل دەمێ کاری گیانێ خوە ژ دەست ددەن سەدێ سەد مافێن وان ناھێنە دان.

نسری ئاماژە ب ھندێ ژی دا، یاسایا کرێکاریێ ل پەرلەمانێ کوردستانێ یا کەڤنە و یا سالا 1971ێ یە، بەلێ ئەو قانوونا نوو یا ل سالا 2015 ژ پەرلەمانێ عیراقێ دەرچووی، زێدەتر مافێن کرێکاران ھاتینە دابینکرن، چونکو د قانوونا کەڤن دا مافێن کرێکاران ب رێنمایان ڤە ھاتینە گرێدان و د قانوونا نوو دا مافێن وان ب قانوونێ ڤە ھاتینە گرێدان و بۆ خۆلا نوو یا پەرلەمانی دێ ئێکەم داخوازیا مە ژ پەرلەمانتاران جێبەجێکرنا ڤێ قانوونا نوو بیت.











باسنيوز