ئەو پیاوەی لە شاری سلێمانی پەلاماری پزیشکێکی دا و بە سێ فیشەک برینداری کرد، لە ژێر نەشتەرگەریدا گیانی لەدەست دا.

ئێوارەی ڕۆژی ٣ی کانوونی یەکەمی ساڵی ٢٠١٨، لە شەقامی ئۆرزدیی شاری سلێمانی، پیاوێک بە دەمانچە دەچێتە سەر نۆرینگەی پزیشکێکی ئێسک و شکاوی بەناوی دکتۆر (ک. ئ. س)، بە دەمانچە دەستڕێژی گوللەی لێ کرد و بە سێ فیشەک بەسەختی برینداری کرد.

دوای ڕووداوەکە ھێزە ئەمنییەکانی سلێمانی تەقەکەرەکەیان دەستگیر کرد و لەکاتی دەستگیرکردنەکەشدا تەقەکەرەکە لەبەردەم ڕۆژنامەنووسان و کەناڵەکانی ڕاگەیاندن بە دەمامکەوە نمایشکرا، ھێزە ئەمنییەکان نەیانھێشت ھیچ قسە و ڕوونکردنەوەیەک لەسەر ھۆکاری تەقەکردنەکە بدات.

بنەماڵەی پزیشکەکە، سازشیان بۆ تەقەکەرەکە کردووە و داوای ئازادکردنیان کردووە، تاوەکوو ببرێتە دەرەوەی ھەرێمی کوردستان بە مەبەستی چارەسەرکردن، چونکە تەقەکەرەکە نەخۆشییەکی تووش بووە و پێشتریش لەلایەن دکتۆر کەمال ئەحمەدەوە نەشتەرگەری بۆ کراوە. بەو هۆیەشەوە بڕیاری ئازادکردنی تەقەکەرەکە دراوە.

بە مەبەستی چارەسەر، تەقەکەرەکە بردراوەتە ئێران و نەشتەرگەری بۆ کراوە، بەڵام نەشتەرگەرییەکەی سەرکەوتوو نەبووە و ئێوارەی دوێنێ دووشەممە ١٦ی ٧ی ٢٠١٩ لەژێر نەشتەرگەریدا گیانی لەدەست داوە.









باسنيوز