جێگری بەڕێوەبەری تەندروستیی چەمچەماڵ کوژرانی دوو برای لە گوندێکی سەر بەشارەدێی سەنگاو لەسنووری قەزای چەمچەماڵ ڕاگەیاند.

ئەیوب حەمەغەریب، جێگری بەڕێوەبەری بەڕێوەبەرایەتیی تەندروستیی چەمچەماڵ، ڕاگەیاند: "ئێوارەی دوێنێ سێشەممە 9/7/2019، تەرمی کەسێک گەیەندرایە بەشی فریاکەوتنی نەخۆشخانەی شەھید پێشڕەو لە چەمچەماڵ، کە بەھۆی شەڕەوە لەگوندی (ڕەبات)ی شارەدێی سەنگاو کوژرابوو".

گوتیشی: "کوژراوەکە ناوی (م، ف، ح)ە و تەمەنی 17 ساڵ بووە و تەرمەکەی ڕەوانەی پزیشکی دادوەری سلێمانی کراوە".

جێگری بەڕێوەبەری بەڕێوەبەرایەتیی تەندروستیی چەمچەماڵ ئاماژەی بەوەش دا: "لەھەمان ڕووداودا برایەکی دیکەی کوژراوەکە بەناوی (ت، ف، ح)ی تەمەن 29 ساڵ کوژراوە و ڕاستەوخۆ تەرمەکەی ڕەوانەی سلێمانی کراوە".