پەرلەمانتارێکی پارتی: کاندیدی ڕاسپێردراو بۆ حکوومەت ٩٠ دەنگ دەھێنێت
سەفین ئاغا گەردی، ئەندامی فراکسیۆنی پارتی لە پەرلەمانی کوردستان ڕاگەیاند: "کاتژمێر ١١ی پێش نیوەڕۆی ئەمڕۆ چوارشەممە ١٠ی ٧ی ٢٠١٩ لە پەرلەمانی کوردستان دانیشتن دەکرێت و لە دانیشتنەکەدا ناو و سیڤیی وەزیرەکانی کابینەی نۆیەمی حکوومەتی ھەرێمی کوردستان دەخوێندرێتەوە و دواتر کابینەی نوێی حکوومەت دەخرێتە دەنگدانەوە کە بریتییە لە سەرۆکی حکوومەت و وەزیرەکانی کابینەی نۆیەم".
ئەو پەرلەمانتارە ڕوونیشی کردەوە: "بەپێی ڕێککەوتنی سیاسی، سەرۆکی ڕاسپێردراو بۆ پێکھێنانی کابینەی نوێی حکوومەت، ٩٠ دەنگ دەھێنێت و وەزیرەکانیش جارێ دیار نییە".
سەفین گەردی ئەوەشی خستە ڕوو: "مەسرور بارزانی بە بۆنەی دەست بەکاربوونییەوە، وتارێکی دەبێت و لە وتارەکەدا رەوشی ئیدارە و پەرلەمان و حکوومەت و ھەنگاوەکانی داھاتووی دەخاتە ڕوو".
