کۆریای باشوور بە گرینگییەوە دەڕوانێتە ئاستی پەیوەندییەکانی لەگەڵ هەرێمی کوردستان و لە قۆناغی داهاتوودا ئاستی پەیوەندییەکان بە ئامانجی ستراتیژیی هاوبەش فراوانتر دەکرێن. کونسووڵی گشتیی کۆریای باشوور لە هەولێر دەڵێت، گەشبینن بەوەی کەسێکی بلیمەتی وەک نێچیرڤان بارزانی سەرۆکی هەرێمە.

بۆ چۆی کوانژین، کونسووڵی گشتیی کۆریای باشوور لە هەولێر، ڕاگەیاند: "کۆریای باشوور بەگرینگەوە دەڕوانێتە ئاستی پەیوەندییەکانی لەگەڵ هەرێمی کوردستان و هەرێمی کوردستان دۆستی لەمێژینەی کۆریای باشوورە، لە قۆناغە جیاوازەکان گۆڕانکاری بەسەر پەیوەندییەکاندا هاتووە و هەمیشە بەرەو بەهێـزی چووە، لە قۆناغی داهاتوو پەیوەندییەکان زیاتر پەرەیان پێ دەدرێـت، لە ڕووی ئابووری و پەیوەندییە دیپلۆماسییەکانەوە."

کونسووڵی گشتیی کۆریا ڕایشیگەیاند: "ئێستا لە هەرێمی کوردستان قۆناغێکی تر هاتووەتە ئاراوە، هەرێمی کوردستان شوێنێکی لەبارە بۆ جموجووڵی ئابووری و هەمەجۆرکردنی ئاستی پەیوەندییەکان. دڵخۆشین کەوا ئێستا پەیوەندییەکی باش لە نێوان هەولێر و بەغدادا هەیە و گرفتەکان چارەسەر کراون، قۆناغی ئایندە قۆناغی جێبەجێکردنی کارنامە و ئامانجی ستراتیژیی هاوبەش دەبێت لە نێوان هەرێمی کوردستان و کۆریای باشووردا."

کوانژین ئاماژەی بەوەش کرد: "گەشبینین بەوەی ئێستا کەسێکی بەهێزی وەک ڕێزدار، نێچیرڤان بارزانی لە سەرۆکایەتیی هەرێمی کوردستانە. ئەو، کەسێکی بلیمەت و بەتوانایە لە ڕووی سیاسی و پەیوەندیی نێودەوڵەتییەوە و باش دەزانێت زمانی دیپلۆماسی بەکار بێنێت و شارەزایە لە دەوڵەتداری، ئومێدی سەرکەوتنی بۆ دەخوازین."

kdp -