رێڤه‌به‌رێ په‌یوه‌ندى وراگه‌هاندنێ ل سه‌رۆكاتیا باژێرڤانیا پارێزگه‌ها دهۆكێ دیاركر ژبه‌ر بارانێ مه‌ترسیى ل سه‌ر وان خانیان دروستبوو یێن نێزیك رووبارى هشكه‌ روو هاتینه‌ ئاڤاكرن ئه‌ڤ سالا ژبۆ كیمكرنا وێ مه‌ترسیى دێوارێن پالپشت بۆ رووبارى هشكه‌روو دهێنه‌ دروستكرن داكو ده‌مێ ئاڤا گه‌له‌ك بلند دبیت نه‌چیته‌ دناڤ خانیێن وه‌لاتیاندا.



ئسماعیل مسته‌فا، رێڤه‌به‌رێ په‌یوه‌ندى وراگه‌هاندنێ ل سه‌رۆكاتیا باژێرڤانیا پارێزگه‌ها دهۆكێ بۆ(باسنیوز)دیاركر: "ب كوژمێ 253 ملیون دیناران ده‌ست ب چێكرنا دێوارین پالپشت ل سه‌ر رووبارى هشكه‌روو هاتیه‌ كرن ل ناڤ سه‌نته‌رێ پارێزگه‌ها دهۆكێ دده‌مێ دا هژماره‌كا خانیان ب شێوه‌یێ زێده‌گاڤى ل سه‌ر رووبارى هشگه‌روو هاتینه‌ ئاڤاكرن نوكه‌ ده‌مێ باران دهێت مه‌ترسیى چوونا ئاڤى بۆ ناڤ خانیێن وه‌لاتیان ل سه‌ر رووبارى دروست دبیت".



گۆتژی: "نوكه‌ ژى درێژاهیا 400 مه‌تران ب بلنداهیا چار مه‌تران دیواره‌كى پالپشت هاتیه‌ دروستكرن ودێواره‌كى دى ژى بلنداهیا چار مه‌تران ودرێژاهیا 85 مه‌تران نوكه‌ یێ دهێته‌ دروستكرن داكو ده‌مى ئاڤا بلند دبیت نه‌گه‌هته‌ ناڤ مالێن وه‌لاتیان وژیانا خه‌لكێ یا پاراستى بیت ژ باران بارینێ".



خۆیا ژى كر:" ده‌مێ باران وله‌هیى دروست دبن ل سه‌ر رووبارى هشكه‌ روو مه‌ترسیى ل سه‌ر ژیانا خه‌لكێ دروست دبوو نوكه‌ ژى ئه‌م دخوازى دكه‌ین وه‌لاتیێن مالێن وان ل سه‌ر رووبارى هشكه‌ روو دهشیاربن ده‌مى گه‌شناسى مه‌ترسیا باران بارینێ رادگه‌هینت ئه‌و خه‌لك پتر هشیاربن بۆ به‌رهه‌نگاریا هه‌ر روودانه‌كا نه‌چاڤه‌ریكرى ل سه‌ر رووبارى هشكه‌روو".



رووبارێ هشكه‌ روو ب درێژاهیا 12 كیلومه‌تران یێ درێژه‌ دناڤ پارێزگه‌ها دهۆكێ را دبۆریت رێژه‌كا زۆر خانیان ل نێزیك رووبارێ هشكه‌روو هاتینه‌ ئاڤاكرن وده‌مێ باران گه‌له‌ك دهێت وله‌هیى دروست بن مه‌ترسیى ل سه‌ر ژیانا وان خانیان دروست دبیت.

bas news-