مەحموود عوسمان سیاسەتمەداری كورد و پەرلەمانتاری پێشووی عێراق لەبارەی حكوومەتەكەی دكتۆر عادل عەبدولمەهدیەوە رایگەیاند كە دەبێ ئەركی سەرەكی سنوورداركردن و نەهێشتنی گەندەڵی بێت لە عێراق، كە زۆر فرەوان بووە.


ئەمڕۆ چوارشەممە مەحموود عوسمان لە هەژماری خۆیدا لە تۆڕی كۆمەڵایەتیی فەیسبووك نووسیویەتی پێویستە دكتۆر عادل لە پێکهێنانى حكوومەتەكەیدا دەرس لە ڕابردوو وەربگرێ و تیمێکى هاوکار لەگەڵ یەکتری و خاوەن ئەزموون دروست بکات، لەمەش گرنگتر ئەوەیە کەچى ئەنجام دەدەن لە کارە لەپێشینەكاندا.


سیاسەتمەدارە كوردەكە ئاماژەی بەچوار خاڵ كردووە بۆ حكوومەتی نوێی عێراق و لە یەكەمدا نووسیویەتی "لەناوبردنى گەندەڵى کە زۆر فراوان بووە و کارى خراپى لە هەموو ڕوویەکەوە کردووەتە سەر دەوڵەت و هاووڵاتیان".


هەروەها نووسیویەتی "پێویست بەدابینکردنى خزمەتگوزارى پێویست دەكات بۆ هاووڵاتیان، کە زۆر کەمە، وەکو لە بەسرە و شوێنى تر بینیمان و بووەتە کێشەیەکى هەرە گەورەى هاووڵاتیان و ساڵ بەساڵ خراپتر بووە".


مەحموود عوسمان لە سێیەم خاڵدا نووسیویەتی كە پێویست بەچاکسازى هەیە لە ڕووەكانى ئیدارى و دارایى و ئاسایش و کۆمەڵایەتى، هەروەها ئەنجامدانى چاکسازى لە دەزگاى دادوەری. لە خاڵی كۆتاییشدا ئاماژەی بەپێویستی هەوڵدان بۆ پتەوکردن و فراوانکردنى پەیوەندییە نێودەوڵەتیەکانى عێراق و ڕاگرتنى باڵانس لە نێوان ئەمریکا و ئێران بەشێوەیەکى بابەتیانە كردووە.


پەرلەمانتارە پێشووەكەی عێراق ئەوەشی نووسیوە كە پێویستە دكتۆر عادل عەبدولمەهدی هەوڵ بدات بەجیدى بۆ چارەسەرى کێشەکان لەگەڵ هەرێمى کوردستان، هێزە کوردستانییەکانیش دەبێت هاوڕا بن و پێداگیرى لەم ڕووەوە بكەن.
bas news -