ژمارەیەک هاووڵاتیی مەسیحی و کوردی ئێزدی لە سنووری پارێزگای دهۆک دەکرێنە بەڕێوەبەری گشتی.



بێریڤان سالم، جێگری سەرۆکی ئەنجومەنی پارێزگای دھۆک بە ماڵپەڕی فەرمیی پارتی دیموکراتی کوردستانی راگەیاندووە، تا ئێستا پێنج بەڕێوەبەری گشتی لە دهۆک گۆڕدراون و حەوتی دیکەش دەگۆڕدرێن.



بێریڤان سالم هەروەها رایگەیاندووە، لە شوێنی حەوت بەڕێوەبەرە گشتییەی بەم زووانە دەگۆڕدرێن، جێگای هەردوو پێکهاتەی مەسیحی و ئێزدی دەکرێتەوە و بەشێک لە پۆستی بەڕێوەبەرە گشتییەکان دەدرێن بە هاووڵاتییانی سەر بەو دوو ئاینە.



لە کوردستان، بە پێچەوانەی وڵاتانی رۆژهەڵاتی ناوەڕاست، هەموو ئاین و نەتەوەکان بە ئاشتییانە بەیەکەوە دەژین و بەشداریی خۆشی و ناخۆشییەکانی یەکتر دەکەن.



حکوومەتی هەرێمی کوردستان لە سەرەتای دامەزراندنییەوە لە ساڵی 1992، لەسەر بنەمای هاووڵاتیبوون مامەڵە لەگەڵ هەموو ئاین و نەتەوەکان (ئیسلام، مەسیحی، ئێزدی، کاکەیی، کورد و تورکمان و ...) دەکات و لە کوردستان هیچ جیاکارییەک لەنێوان ئەو پێکهاتانەدا ناکرێ.





باسنیوز