ئاوارەکانی کەمپی دیبەگە دەگەڕێنەوە ناوچەکانی خۆیان، کە بەهۆی داگیرکاریی رێکخراوی توندڕەوی داعش ئاوارەی هەرێمی کوردستان ببون.

رزگار عوبێد، بەرێوەبەری کەمپی دیبەگە رایگەیاند،

رۆژی شەممە 24ـی ئەیلوولی 2016 نزیکەی 447 خێزانی ئاوارەی کەمپی دیبەگە بۆ گوندەکانی عوسەجە و جەدعە لە شارۆچکەی گەیارە گەڕانەوە.

رزگار عوبێد ئاماژەی بەوەش کرد، کە رۆژێک پێش جەژنی قوربان، 173 خێزانی دیکەی ئاوارە لەکەمپی دیبەگە بە هەماهەنگیی هێزەکانی پێشمەرگە، چەکدارانی عەشیرەتە سوننییەکانی ناوچەکە و بەڕێوەبەرایەتیی کۆچ و کۆچبەرانی هەولێر گەڕاونەتەوە.

ئاوارەکانی کەمپی دیبەگە پێکهاتوون لە هاووڵاتییانی شاری مووسڵ و ناوچەکانی دیکەی پارێزگای نەینەوا، کە لە ترسی چەکدارانی داعش پەنایان هێناوەتە بەر پێشمەرگە.

ئەو ناوچانە ئاوارەکان بۆی گەڕاونەتەوە، ماوەیەک پێش ئێستا لەلایەن سوپا و هێزە عێراقییەکان رزگار کرایەوە.

هەروەک بەرپرسانی باڵای حکوومەتی هەرێمی کوردستان رایدەگەیەنن, بەهۆی شەڕی تائیفیی و هێرشی داعش، زیاتر لە 1.5 ملیۆن هاووڵاتیی پارێزگاکانی باشوور و ناوەڕاستی عێراق، روویان لە هەرێمی کوردستان و ناوچەکانی ژێر دەسەڵاتی پێشمەرگە کردووە.

دوای هەرەس پێهێنانی سوپا و هێزە ئەمنییەکانی عێراق لە مانگی حوزەیرانی 2014 چەکدارانی داعش زۆربەی شارەکانی پارێزگاکانی نەینەوا، دیالە، سەڵاحەدین و ئەنباریان لە عێراق داگیر کرد.


















باسنیوز