لە قەزای پێنجوێن بە مەبەستی دەربڕینی ناڕەزایەتی لە بەرامبەر دستگیركردنی پێنج ئەندامی دەستەی بەرەی ناڕەزایەتی خەڵك لە لایەن هێزە ئەمنیەكان، ژمارەیەك هاونیشتمانی لەبەردەم بەڕێوەبەرایەتی ئاسایشی پێنجوێن گردبوونەوەی ناڕەزایەتیان ئەنجامدا و دواتر ئەو کەسانە ئازادکران.

شەوی سێشەممە 20-9-2016 لە شارۆچكەی پێنجوێنی سەر بە پارێزگای سلێمانی ژمارەیەك هاونیشتمانی گردبوونەوەیەكی ناڕەزایەتیان ئەنجامدا و داوای ئازادكردنی پێنج ئەندامە دستگیركراوەكەی دەستەی بەرەی ناڕەزایەتی خەڵكیان كرد. لە بەرامبەریشدا ئاسایشی شارەکە ئەو پێنج چالاکڤانەی ئازادکرد.



رۆژی سێشەممە 20-9-2016 هەریەك لە "ئاوات حەسەن، هەورامان نیعمەت، مستەفای حەسەن گەورە، دڵشاد مەحمود، عادل حەسەن" ئەندامانی دەستەی بەرەی ناڕەزایەتی خەڵك دوای سەردانیكردنی گردبوونەوەیەكی ناڕەزایەتی مامۆستایانی پێنجوێن، دەستبەسەركران.

دەستەی ناڕەزایەتی خەڵك 17-9-2016 لە سلێمانی بەمەبەستی ئامادەکاری بۆ خۆپیشاندان لە 27-9-2016 پێکهێنرا.

نەبەز بابان ئەندامی دەستەی بەرەی ناڕەزایەتیەكانی خەڵك لە كۆنفرانسێكی رۆژناڤانی لە شاری سلێمانی رایگەیاند، لەم هەلومەرجە پڕقەیرانەدا كۆمەڵێك كەس لەسۆنگەی خەمخۆریان بۆ چارەسەركردنی كێشەكان و كەمكردنەوەی ئازارەكانی خەڵك دەستەی مامۆستایانی ناڕازی و بەرەی خەڵكیان دروستكرد. لەسەردانێكی شاندێكیاندا بۆ ناوچەی پێنجوێن، لەكاتی گەڕانەوەیان بۆ سلێمانی لە بازگەیەك دەستگیركراون و رەوانەی ئاسایش كراون.
RUDAW -