وەزارەتی خوێندنی باڵا و توێژینەوەی زانستیی حکوومەتی هەرێمی کوردستان ڕایدەگەێنێت كە تا ئێستا هیچ ڕێژەیەك بۆ وەرگرتنی قوتابیان لە زانكۆكانی كوردستان بۆ ساڵی خوێندنی (2016-2017) پەسند نەكراوە.

عەباس ئەكرەم دزەیی، گوتەبێژی وەزارەتی خوێندنی باڵا و توێژینەوەی زانستی، ڕایگەیاند: "لێژنەی باڵای وەرگرتن لە وەزارەتەكەمان لە كارەكانی بەردەوامە بۆ تاوتوێكردن و داڕشتنی پلانی ڕێژەی وەرگرتن لە زانكۆكان بۆ ساڵی خوێندنی (2016-2017)".

هاوكات گوتەبێژی وەزارەتی خوێندنی باڵا، ئەوەشی ڕوون كردەوە: "بابەتی وەرگرتنی قوتابیان لە زانكۆكان پەیوەستە بەو پلانەی كە لەلایەن وەزارەتەكەمان بە هەماهەنگی لەگەڵ زانكۆكان دادەنرێت".

گوتیشی: "تا ئێستا هیچ ڕێژەیەك بۆ وەرگرتنی قوتابیان دیاری نەكراوە، بەڵكوو پلانەكە پەیوەستە بە پێشنیازی زانكۆكان، هەر كاتێكیش پیشنیازەكانیان بە تەواوەتی ڕەوانەی وەزارەت كرد، ئەوكات لەلایەن لێژنەی باڵای وەرگرتن تاوتوێ دەكرێت و ئینجا بڕیاری پێویستی لەبارەوە دەدرێ".













باسنیوز