گوتەبێژی دەستەی گەشتوگوزاری حكوومەتی هەرێمی كوردستان دەڵێ، گەشتوگوزاری هەرێم ئامادەكاری بۆ هێنانی گەشتیار بۆ ڕۆژانی جەژن دەكات و، بۆ ئەو مەبەستەیش ئەمڕۆ كۆبوونەوەیەك لە نێوان بەڕێوەبەرە گشتییەكاندا بەرێوە چوو و چەندین بڕیاری گرینگ دران.

(نادر رۆستی)، بە‌ ماڵپەڕی فەرمیی پارتی دیموكراتی كوردستانی راگەیاند: "بە شێوەی ڤیدیۆ دوێنێ كۆنفڕانس و كۆبوونەوەی هاوبەش لە نێوان سەرجەم بەڕێوەبەرایەتییە گشتییەكانی (هەولێر، سلێمانی، دهۆك و گەرمیان) بە سەرپەرشتیی دەستەی گەشتوگوزار كرا، لە كۆبوونەوەكەدا سەرجەم بەڕێوەبەرانی دیوانی دەستە و بەڕێوەبەرانی بەڕێوەبەرایەتییە گشتییەكان لە شارەكانی خۆیان لە رێگەی هێڵی ئینتەرنێت بە ڤیدیۆكۆنفرانس ئامادە بوون".

گوتەبێژی دەستەی گەشتوگوزار راشیگەیاند: "لە كۆبوونەوەكەدا كۆمەڵێك بابەتی گرینگ بۆپێشخستنی گەشتوگوزار باس كران و چەند رێنماییەك بۆ چارەكردنی گرفتەكان و پێشخستنی كەرتی گەشتیاری دەركران، یەكەم: گرینگی بە هێنانی گەشتیار لە رێگای گرووپی گەشتیارییەوە بدرێت، دووەم: گرینگیی زیاتر بە بابەتی بەبازاڕكردنی گەشتیاری بدرێت، سێیەم: ئامادەكاری بكرێت بۆ پێشوازیكردن لە گەشتیاران لە رۆژانی جەژندا٬ بۆئەم مەبەستەیش هەماهەنگی لەگەڵ بازرگانەكان بكرێ، چوارەم: گرینگی بە دەستنیشانكردنی فەرمانبەری لێهاتوو بدرێت كە خاوەنی داهێنان و بیرۆكە بێت و تاكو لە 27/9 خەڵات بكرێت، پێنجەم: پۆلینی و پشكنینی بنكەكانی گەشتیاری بە شێوەی ئەلیكترۆنی بكرێت، شەشەم: هەڵسەنگاندن بۆ جێبەجێكردنی پلانی ٢.١٦ بكرێت و وەك خۆی جێبەجێ بكرێت و كەموكورتی دەستنیشان بكرێ، حەوتەمیش: بەدواداچوون بۆ كۆمپانیاكانی گەشتیاری بكرێت، ئەو كۆمپانیایەی گەشتیار بۆ كوردستان نەهێنێت، بڕی ٤ ملیۆن رسوماتی لێ وەربگیرێت، بەڵام ئەو كۆمپانیایەی گەشتیار بێنێت، زۆر هاوكاری بكرێ و تەنیا ٥٠ بۆ ٧٠ هەزار رسوماتی لێ وەربگیرێ".








KDP