بۆردوومانەكەی شەوی ڕابرد، هیچ زیانێكی گیانی بە دانیشتووانی سیدەكان نەگەیاندووە، بەڵام وەك بەڕێوەبەری شارەدێكە دەڵێ، بە هۆیەوە زیانێكی زۆری ماددی بەر ناوچەكە كەوتووە و، مەترسیی لەسەر دانیشتووانەكەی دروست كردووە.

(كاروان كەریمخان) بەڕێوەبەری شارەدێی سیدەكان، بۆ ماڵپەڕی فەرمیی پارتی دیموكراتی كوردستان گوتی: "شەوی رابرد، دوو فڕۆكەی جەنگیی توركیا دەڤەری سیدەكانیان بۆردوومان كردووە، راستە بۆردوومانەكە جگە لە زیانی ماددی هیچ زیانێكی گیانی لێ نەكەوتووەتەوە، بەڵام ترس و دڵەڕاوكێی لای دانیشتووانی ناوچەكە دروست كردووە، ئەگەر بۆردوومانەكانیش بەردەوام بن، كە بە درێژایی ئەمساڵ توركیا بۆردوومانی ناوچەكەی كردووە، وەك جارەكانی پێشوو خەڵكی ناوچەكە گوند و ئاواییەكان چۆڵ دەكەن".

(كەریمخان) گوتیشی: "جووتیار و مەڕدارێكی زۆر لە ناوچە كوێستانییەكانن و بۆردوومانەكان مەترسین بۆ سەر ژیانی ئەو جووتیار و مەڕدارانە، بەردەوام داواكاریی هاووڵاتیان و مەڕدارانیش ئەوەیە كە، پەكەكە بنكە و بارەگاكانی خۆی بباتە دەرەوەی گوندەكان، بەڵام گوێ بە كەس نادەن و رۆژ بۆ رۆژ خۆیان نزیكتر دەكەنەوە لە گوند و ئاواییەكان، ئەوەیش ترس و دڵەڕاوكێی لای دانیشتووانی سنوورەكە دروست كردووە".










KDP